Elimizdiń tennıs federasııasy atalǵan týrnırdi asa joǵary deńgeıde ótkizý maqsatynda qysqa merzimde qyrýar is tyndyrdy. «Almaty Arenada» negizgi korttan bólek, qosymsha alańdar da bar. Alǵashqysy 6 000, ekinshisi 1 000 kórermenge eseptelgen. Keshenniń syrtynda ornalasqan eki kort pen úsh jattyǵý alańynda esh alańsyz daıarlanýǵa qolaıly jaǵdaı jasaldy. Tósenishter halyqaralyq standartqa saı. «Almaty Open» týrnıriniń kórsetilimi 40-tan asa memleketke tarady. Teledıdardan ony 3 mıllıonnan asa kórermen tamashalasa, túrli platformalar arqyly kórýshilerdiń sany 8,5 mılıonnan asty.
Alǵashynda osy jarysqa qatysýǵa nıet bildirgen fransııalyq Artýr Fıs pen ıtalııalyq Flavıo Kabollı týrnırge kelmedi. Elimizdiń birinshi raketkasy Aleksandr Býblık te bul básekede boı kórsetpedi. Barlyǵy da jaraqat alyp qalypty. Týrnırdiń negizgi bóliginde elimizdiń tórt ókili óner kórsetti. Soqyr jerebe Aleksandr Shevchenko men Mıhaıl Kýkýshkındi alǵashqy aınalymda jolyqtyrdy. Bul tartys alǵashqysynyń paıdasyna sheshildi. Tımofeı Skatov Tomash Mahachtan utylsa, Beıbit Juqaev dál sol Chehııanyń oıynshysyn jolynan yǵystyrdy. Tusaýkeser kezdesýinde Beıbit lıvandyq Benıamın Hassannan basym tústi. Biraq jerlesterimizdiń odan árige shamalary jetpedi. Shırek fınalda Shevchenko (álemniń 61-raketkasy) argentınalyq Fransısko Serýndolodan (31), Juqaev (213) reseılik Karen Hachanovtan (26) utyldy.
Jartylaı fınaldyq kezdesýler mynadaı nátıjemen aıaqtaldy: Fransısko Serýndo – Gabrıel Dıallo (Kanada, 118) 4:6, 2:6. Karen Hachanov – Aleksandr Výkıch (Aýstralııa, 85) 6:7 (3:7), 6:3, 6:4. Fınaldyq oıyn 6:2, 5:7, 6:3 esebimen K.Hachanovtyń paıdasyna sheshildi. Juptyq saıysta Úndistan tennısshileri – Ardjýn Kadahe men Rıtvık Bollıpallıdiń baǵy jandy.
