Amerıkada atoı saldy

34 jastaǵy Baqytkeldi Jetisý oblysy Kerbulaq aýdanynyń týmasy. Sol óńirde ol ár jyldary álem, Azııa chempıony atanǵan Berik Jetpisbaev, Meıirjan Qa­shaǵanov, Dildásh Quryshbaeva taǵy basqa belgili balýandardy tár­bıelegen maıtalman maman Ba­qyt Qoqysbekovtiń qol astynda jattyǵyp, kúres óneriniń qyr-syryna qanyqty. Keıin Asan Joldybaev, Varvara Masıagına, Ermek Násıevten tálim-tárbıe aldy. Qol jetkizgen tabysy jaman emes. Sambo men dzıýdodan jas­óspirimder men jastar arasynda oblys chempıony boldy, respýb­lıkalyq týrnırlerde san márte júldegerler qatarynan kórindi.

Sport pen bilimdi qatar alyp júrgen Baqytkeldi Qasenovtiń tórt dıplomy bar. Áý basta Qa­zaqtyń dene shynyqtyrý, týrızm jáne servıs kolledjinde oqysa, keıin Sport jáne týrızm akademııasy, Eýrazııa tehnologııa ýnıversıteti, Qazaq ulttyq agrarlyq ýnıversıtetin tá­mam­dady. Túrli salada eńbek etip, birneshe shet tilin jetik meń­gerdi. Sol eńbeginiń jemisin kórip, sonymen qatar bilimin je­tildirý maqsatynda AQSh-qa attandy. Bul kúnderi otbasymen birge Los-Andjeleste turyp jat­qan qazaqtyń uly sporttan da alshaqtaǵan joq.

– Bozbala shaǵymnan balýandyq ónerge ańsarym aýdy. Kindik qanym tamǵan Kerbulaq aýdanynda dzıýdo men sambonyń damý barysy óte keremet. Baqyt Qoqysbekov esimdi myqty maman osy sport túrleriniń Saryózek óńirinde damýyna barynsha eńbek sińirdi. Men sol kisiniń qol astynda jattyǵyp, Berik Jetpisbaev, Meıirjan Qa­shaǵanovtaı aǵalaryma elik­tep óstim. Olardyń sambodan baǵyndyrmaǵan belesi joq. Dzıýdoda da ózderin moıyndatty. Kelesi aıda Baqyt Jáketuly 70 jyldyq mereıtoıyn atap ótkeli jatyr. Sóz oraıy kelgende, ulaǵatty ustazyma Amerıkadan jalyndy sálem joldap, óskeleń urpaqty sport pen salamattyqqa baýlyp qana qoımaı, ómirde de durys baǵyt-baǵdar bere bilgen abzal azamatty ataýly kúnmen qut­tyqtaǵym keledi, – deıdi Baqytkeldi.

Jýyrda ǵana Amerıkadan qýa­nyshty habar jetti. Aınal­dyrǵan bir aı ishinde Baqytkeldi úsh birdeı dúbirli dodaǵa qa­tysyp, barlyǵynda da oljaǵa keneldi. Atap aıtsaq, dzıýdodan Nankadaǵy «Nanka Fall Tournament», San-Hosedegi «San Jose open» týrnırlerinde bas júldeni oljala­dy. Sol jarystarda meksıkalyq Hose Alvarado, japonııalyq Kýlen Iаmosakı, amerıkalyq Ro­bert Nıkols, qytaılyq Ja­son Lı men Dakta Chın syndy tanymal sportshylarǵa san soqtyrdy. Sonymen qatar djıý-djıtsýdan uıymdastyrylǵan Los-Andjelestegi dodada qola medaldy moınynda jarqyratty. B.Qasenovtiń endigi maqsaty – halyqaralyq arenada atoı salý.