Asý álemdegi eń beldi promoýshende óte jaqsy óner kórsetip júr. UFC-men byltyr ǵana kelisimshartqa otyrǵan 30 jastaǵy faıter sol kezden beri úsh kezdesý ótkizip, barlyǵynda jeńiske jetti. Kúni keshe ǵana ol atalǵan uıymnyń reıtınginde jetinshi orynda turǵan Brazılııanyń óte tájirıbeli sportshysy Mateýs Nıkolaýmen (19-4-1) kúsh synasty. Bul básekeni Almabaev merziminen buryn aıaqtaı almasa da, ár raýnd saıyn ústemdigin kórsetti. Aıqas aıaqtalǵannan keıin barlyq tóreshi qandasymyzdyń myqtylyǵyn biraýyzdan moıyndady.
UFC reıtınginde osyǵan deıin 14-orynda turǵan Asý Almabaev sońǵy jeńisinen keıin birden jeti satyǵa joǵarylady. Qazir «Zulpyqar» (Asýdyń janama esimi) jetinshi orynda. Bul salmaqtyń chempıondyq táji brazılııalyq Aleksandr «Adam jegish» Pantojaǵa tıesili. Úzdik úshtiktiń qatarynda amerıkalyq Brendon «Janalǵysh balaqaı» Roıvel, meksıkalyq Brendon «Dóreki jigit» Moreno, ıraktyq Ámir «Hanzada» Albazı syndy sańlaqtar bar. Eger Asý aldaǵy eki-úsh jekpe-jekte jeńiske jetse, onda joǵaryda esimderi atalǵan jampozdardyń birin ornynan yǵystaryp, altyn belbeýge bir taban jaqyndaı túsedi.
