Sýretti túsirgen – Jumabaı MUSABEKOV
Qanshama jyldan beri halyqtyń ýaıymyna aınalǵan eski kópir jóndeýge kelmeıdi. Ornyna jańa nysan salynbasa, jańǵyrtqanmen keıin báribir isten shyǵatyny anyq. Memleket basshysynyń Jetisý oblysyna jumys sapary barysynda bergen tapsyrmasynyń biri oblystyq mańyzy bar avtomobıl jolynyń boıynda ornalasqan 15 appattyq kópirdi qalpyna keltirý bolatyn. Osy rette oblys ákimdigi jańa qurylystyń jobalyq-smetalyq qujattamasyn ázirlep, memlekettik saraptamanyń oń qorytyndysyn aldy.
«О́tken jyly Eskeldi aýdanynyń Baqtybaı, Kerbulaq aýdanynyń Maıtóbe, Kóksý aýdanynyń Jarlyózek aýyldarynda úsh kópir salynyp, qoldanysqa berildi. Al Sarqan men Qaratal aýdandarynda taǵy ekeýiniń qurylysy bıylǵy jyldyń qarasha aıynyń sońyna deıin aıaqtalady. Qalǵan onynyń qurylysy 2025 jyly bastalady», deıdi Jetisý oblysy Jolaýshylar kóligi jáne avtomobıl joldary basqarmasy basshysynyń orynbasary Aıdos Dosjanov.
Osydan birer jyl buryn Muqan Tólebaev aýylynyń turǵyndary kópir salý máselesin oblys ákimimen bolǵan kezdesýde kótergen edi. Bul – Muqan Tólebaev, Shubartúbek, Úlgi eldi mekenderin ortalyqpen jalǵastyryp turǵan mańyzdy ótkel. Oǵan qosa aýyl balalary mektepke osy kópir arqyly barady. Sol sebepti de nysannyń áleýmettik mańyzy basty nazarǵa alynǵan.
«Bul kópir bizdi basqa aýyldarmen, ortalyqpen baılanystyrady. Kópir arqyly kórshiles Shubartúbek aýylynyń balalary bizdiń aýylǵa mektepke oqýǵa keledi. Sondyqtan bul – asa mańyzdy qurylys. Qanshama jyldan beri eskirip tur. Qaıta salatynyna kóńilimiz marqaıyp qaldy», dedi Muqan Tólebaev aýylynyń turǵyny Berikbol Shaltaev.
О́ńir ákiminiń baspasóz qyzmetiniń málimetinshe, atalǵan kópirde jaryqtandyrý men jaıaý júrginshi joly qarastyrylǵan. Qazir qurylys alańynda 25 maman, 13 tehnıka jumys istep júr. Sol sııaqty Qaratal aýdanyndaǵy Kókdala aýylynda sýarý kanalynan ótetin jańa kópir salynyp jatyr. Uzyndyǵy 45 metr bolatyn ótkeldiń qurylysy 2023 jyly bastalǵan, búginde aıaqtalýǵa jaqyn, qosymsha eski kópirdi buzý jumystary júrip jatyr.
Jetisý oblysy
