Atalǵan óndiris ornynyń negizgi kásiporyndary Aqtoǵaı men Bozshakólde oryn tepken. Az ýaqyttyń ishinde aldyńǵy qatarly damý kórsetkishterin áıgilep otyrǵan «KAZ Minerals» qorynyń basym bóligi álemdik deńgeıdegi ashyq túrdegi kenishterden turatyn kompanııaǵa aınaldy. Sýlfıdti kendi qaıta óńdeý qýatyn eki ese arttyratyn Aqtoǵaıdy keńeıtý jobasy 2021 jyldyń qazan aıynda iske qosylyp, jeltoqsan aıynda tutynýshylarǵa alǵashqy ónimin jetkizdi. Búginde «KAZ Minerals»-ta Qazaqstan men Qyrǵyzstandaǵy kásiporyn qyzmetkerlerin qosa eseptegende shamamen 14 000 adam jumys isteıdi.
2014 jyly 31 qazanda kompanııany qaıta qurý jumysy máresine jetti. 2015 jyldyń jeltoqsan aıynda Aqtoǵaıda alǵashqy katodty mys óndirilse, osy kenish ornynda birinshi sýlfıdti fabrıka iske qosylyp, jumys aıasyn keńeıtti. Sýlfıdti kendi qaıta óńdeý jónindegi jyldyq qýaty 25 mln tonnaǵa deıin ósti. 2015 jyly Shyǵys Qazaqstan men Bozymshaqtaǵy katodty mystyń jalpy óndiris kólemi 81 myń tonnany qurady. Ilespe ónim retinde 94 myń tonna konsentrattaǵy myrysh, túıirshik túrindegi 3,14 mln ýnsııa kúmis pen quıma túrindegi 35 myń ýnsııa altyn alyndy. 2016 jyldyń aqpanynda ashylǵan Pavlodar oblysynda ornalasqan ashyq tıptegi iri aýqymdy kenishtiń biregeıi retinde Bozshakól ken baıytý kesheni iske qosyldy. Osy jobalar aıasynda qarqyndy damý kórsetkishteri ósip, «KAZ Minerals»-ty álemdik deńgeıde ashyq túrdegi kenishterden turatyn kompanııaǵa aınaldyrdy.
Qyrǵyzstandaǵy Bozymshaq mys-altyn kenishinde 2017 jyly mystyń jalpy óndiris kólemi 259 myń tonnany qurap, ilespe ónim retinde 58 myń tonna konsentrattaǵy myrysh, 179 myń ýnsııa altyn men 3,506 mln ýnsııa kúmis óndirildi.
«2024 jyldyń birinshi jartyjyldyǵynda «KAZ Minerals» toby 191 myń tonna mys óndirdi. Mys óndirisi 4%-ǵa azaıdy. Degenmen kendegi metall mólsheriniń josparly tómendeýi ónimdiliktiń artýymen ishinara óteldi. Osy kezeńde top rekordtyq 47,5 mln tonna kendi óńdedi, bul 2023 jyldyń birinshi jartyjyldyǵymen salystyrǵanda 7%-ǵa artyq. Esepti kezeńde kúmis pen myrysh óndirisi 5 jáne 6%-ǵa azaıdy, óıtkeni shyǵys óńir men Bozymshaqta ken óndirý metall mólsheri tómen ýchaskelerde júrgizildi. Ashyq karerdegi jumystar toqtap, jańa jerasty kenishiniń qýattylyǵyn artyryp jatqan Bozymshaqta óndiristiń báseńdeýine baılanysty altyn óndirisi 3%-ǵa azaıdy», deıdi «KAZ Minerals» toby korporatıvtik baılanystar departamentiniń menedjeri Ermek Dıýzkenev.
Kompanııa 2016 jyldan bastap demeýshilikpen de aınalysyp keledi. 2016 jyly Semeı qalasyndaǵy sport nysandarynyń qurylysyna 861 mln teńge qarjy bóldi. 2018 jyly tasqyn sýdan zardap shekkenderge kómek qolyn sozdy. Kompanııa bólgen 50 mln teńgege Aıagóz aýdanynyń ortalyǵynda 12 jekemenshik úı men páter satyp alyndy. Byltyrǵy órt oqıǵalary kezinde de mekeme qyzmetkerleri Abaı oblysynda zardap shekkenderge materıaldyq kómek kórsetýde barynsha belsendilik tanytty. Kásiporyn esebinen aımaqtaǵy órt saldaryn joıýǵa 135 mln teńge bólinip, materıaldyq kómek kórsetýge jáne tabıǵı apat keltirgen zalaldy joıýǵa jumsaldy.
Aıagóz aýdanyndaǵy Aqtoǵaı jáne Qopa aýyldaryndaǵy jol jóndeý jáne kóshet otyrǵyzý naýqanyna qarjy bóldi. Jas kóshetterdi satyp alýǵa 2,8 mln teńge jumsady. Sonymen qatar Aıagóz qalasyndaǵy polıtehnıkalyq kolledj jataqhanasyn salý, Aqtoǵaı jáne Qopa aýyldarynyń mektepterine mýzyka aspaptaryn jáne kompıýter jabdyqtaryn satyp alý, Aıagóz aýdanynyń jergilikti stýdentterine shákirtaqy men granttar taǵaıyndaý, Aqtoǵaıdaǵy órt sóndirý bólimin qaıta jańǵyrtý jumystaryn da atap ótýge bolady.
Aımaq basshysynyń bastamasymen oblys ortalyǵynda boı kótergen IT mektep-lıseıiniń qurylysyna «KAZ Minerals» 9 mlrd teńge qarjy aýdarǵan. 1 200 oqýshyǵa arnalǵan jańa oqý ordasynda ınformatıka, mýltımedıa, robottehnıka, grafıka, modeldeý, tokarlyq-slesarlyq sheberhana, qysh buıymdar jasaý men aspazdyq jáne tiginshilikke baýlıtyn 48 oqý kabıneti bar.
«Qazanshuńqyrdan bastap, zamanaýı synyptardy jabdyqtaýǵa deıingi barlyq jumys 10 aıǵa jýyq ýaqytta aıaqtaldy. Merdigerler jáne óńirlik memlekettik organdarmen birlesken qajyrly eńbek pen tıimdi ózara is-qımyldyń arqasynda bul jobany rekordtyq merzimde iske asyra aldyq. Oqýshylar úshin mekteptiń barynsha jaıly jáne qaýipsiz bolýy óte mańyzdy. Munda zamanaýı ınformatıka men robottehnıka synyptary, keń akt zaly men ashana, sport zaldary, ashyq alańdar bar. Sondaı-aq balalar qarym-qatynas jasaı alatyn, shyǵarmashylyqpen aınalysatyn netvorkıng aımaǵy bar. Mektep suranysqa ıe bolatynyna senimdimiz. Bul mektep Semeıdiń betke ustar oqý ornyna aınalyp, Abaıdyń otanynda jańa úrdis qalyptastyrady dep úmittenemiz», deıdi «KAZ Minerals Management» basqarma tóraǵasy Eldar Mamedov.
Abaı oblysy
