«Altyn besik» atalǵan tárbıe oshaǵynyń ashylý rásimine oblys ákimi Qumar Aqsaqalov pen «Halyq» qorynyń basqarýshy dırektory Narıman Ábilshaıyqov qatysty. Saltanatty jıynda jańa úlgidegi mektepke deıingi bilim nysanynyń boı kóterýi – ıgi isti jumyla kóterisken memleket pen atalǵan qordyń, jergilikti belsendi qaýymdastyq ókilderiniń birlesken kúsh-jigeriniń nátıjesi ekeni aıtyldy.
«Halyq» qaıyrymdylyq qory ishi-syrty kelisken úsh qabatty balabaqshanyń qurylysyna 1,3 mlrd teńge jumsaǵan. Sondaı-aq 57 mln teńge qarjyǵa ǵımaratty túgeldeı jabdyqtap shyqqan. Al ákimdik oblys qazynasynan 500 mln teńge qosymsha qarjy shyǵaryp, jańa nysannyń aınalasyn abattandyryp bergen.
«Búgin biz mynadaı úlken balabaqshany ashyp jatyrmyz. Osy oraıda balabaqshaǵa qabyldanǵan kishkentaı bóbekterimiz bútindeı bir jańa álemge enip, jańa ómir bastaıtynyn da aıta ketý kerek. Bul – halyq ıgiligine, el bolashaǵyna salynǵan ınvestısııa. «Altyn besik» balabaqshasy kóptegen aqyldy, talantty, baqytty balany tárbıelep shyǵaratynyna senimdimin», dedi oblys ákimi Qumar Aqsaqalov.
Aýdany 4202 sharshy metr, úsh qabatty jańa balabaqshaǵa 1 jastan 5 jasqa deıingi balalar barady. Mektepke deıingi bilim men tárbıe mekemesinde balalardyń úılesimdi damýy úshin barlyq jaǵdaı jasalǵan: keń oıyn zaly, jatyn bólmeleri, mýzyka, sport zaldary, medısınalyq kabınet, sondaı-aq qosymsha sabaqtarǵa arnalǵan synyptar bar. Munda qazaq, orys tilinde tárbıe beretin on eki top jumys isteıdi.
Áýlıekól aýylynyń turǵyny, kópbalaly ana Yrysty Jansúgirova balalaryn qazaq tobyna beripti. «Ulttyq merekemiz – Respýblıka kúni qarsańynda úlken qýanyshqa kenelip jatyrmyz. Qaı ata-ana bolsyn, kishkentaı qulynshaǵynyń jaqsy balabaqshada sapaly tárbıe alyp, mektepke deıin qatardan qalmaı shırap, jetilgenin qalaıdy. Búgin sol armanymyz oryndalyp, qolymyz uzaryp jatyr. Jańa ishine kirip, bárin aralap, óz kózimizben kórip shyqtyq, naq ertegidegideı, balaǵa kerektiń bári bar. Aýylǵa osyndaı zamanaýı balabaqsha salyp bergen el azamattaryna alǵysym sheksiz. О́te qýanyshtymyn», deıdi kópbalaly ana.
Balabaqsha aýmaǵy abattandyrylǵan, zamanaýı balalar alańy, sport alańdary bar. Ásem ǵımarat beınebaqylaý júıesimen, órtke qarsy dabyl kótergish qurylǵymen jabdyqtalǵan.
Dál osy kúni Qostanaı qalasynyń irgesindegi Mıchýrın aýylynda da memleket pen jeke menshik ıesiniń seriktestigi aıasynda jańa balabaqsha esigin aıqara ashty. «Erketaı» dep atalatyn bul mektepke deıingi bilim mekemesine «Elektrondyq balabaqsha – Indıgo» aqparattyq júıesi arqyly kezekte turǵan 1 jastan 5 jasqa deıingi 100 bala qabyldandy.
Qostanaı oblysy
