Foto: Mýzykalyq jas kórermen teatrynyń baspasóz qyzmeti
Dástúrli óner merekesi bıyl Abaı atyndaǵy memlekettik syılyqtyń ıegeri, jazýshy-dramatýrg Roza Muqanovanyń «Máńgilik bala beıne», «Farıza», «Bopaı hanym», «Sarra» shyǵarmalaryn arqaý etti. Búginde Roza Muqanovadaı teatr úshin óndirtip jazǵan qalamgerler neken-saıaq. Ol teatr qorjynyn nebir taǵylymdy týyndylarymen baıytqan qýatty qalam ıesi.
«Jazýda jalǵan bolmaıdy. Jazýda aqıqat bolady. Jannyń tazalyǵy bolady. Men tym jas kezimde, otyzǵa tolmaǵan shaǵymda «Máńgilik bala beıne» degen pesamdy qara shańyraq Muhtar Áýezov atyndaǵy qazaq drama teatry, reformator, rejısser marqum Bolat Atabaev meniń jastyǵyma qaramaı sahnaǵa shyǵardy. Ol kezde Áýezov teatrynda tek qana klassıkterdiń shyǵarmalary qoıylatyn. Osynaý halyqaralyq festıvalge kezinde Muhtar Áýezovtiń «Qaraly sulýynyń» ınssenırovkasyn jasaǵan bolatynmyn. Qyrǵyz teatry sol shyǵarma jelisindegi qoıylymyn, Ázerbaıjan teatry «Shatyr astyndaǵy men» tragıkomedııasyn alyp keldi. Bul bizdiń kórermenderdiń qoly jete bermegen shyǵarmalar. Sondyqtan da teatrlarymyzdyń esigi aıqara ashyq, spektaldi kórýge kelińizder!», deıdi jazýshy-dramatýrg, Qazaqstannyń eńbek sińirgen qaıratkeri Roza Muqanova.
Festıvaldiń ashylý saltanaty kezinde ártister men qatysýshylar qyzyl kilemmen júrip ótti. Aıtýly festıval Muhtar Áýezov atyndaǵy qazaq ulttyq drama teatry ázirlegen «Máńgilik bala beıne» spektaklimen ashyldy.
«Búgin biz bir apta boıy Astana qalasynyń ákimdigi, Mádenıet basqarmasy, Mádenıet jáne aqparat mınıstrliginiń qoldaýymen úlken teatr merekesin saltanatty túrde ashyp jatyrmyz. Bul festıvaldiń mazmuny, kótergen júgi, atqarar qyzmeti barshamyzǵa belgili. Eldiń yqylasyna bólengen jazýshy-dramatýrg Roza Muqanovanyń shyǵarmashylyǵyna arnaldy.
Túrki dúnıesi, túrki mádenı keńistiginde de Roza Muqanova týyndylarynyń shoqtyǵy bıik. «Máńgilik bala beıne», «Sara», «Bopaı hanym» osy qoıylymdardyń barlyǵy da rýhanı qundylyǵymyzdy dáripteıtin ómirsheń týyndylarǵa aınaldy. Festıvaldiń maqsaty da sol, Roza Muqanovanyń dramatýrgııasyn dáripteý. Osy joly jańa esimderdi ashqymyz keledi», dedi Mýzykalyq jas kórermen teatrynyń dırektory, Qazaqstannyń eńbek sińirgen qaıratkeri Ashat Maemırov.
Elimizdiń túkpir-túkpirinen jınalǵan beldi ujymdar men Qyrǵyzstan, Ázerbaıjannan kelgen ártister bir apta boıyna bas qaladaǵy sahnalarda óner kórsetedi. Halyqaralyq teatr festıvali 3 qarashaǵa deıin jalǵasady.
Al olardyń qarym-qabiletin kóziqaraqty kórermenmen birge, Álııa Bópejanova, Amangeldi Muqan, Anar Erkebaı syndy belgili mádenıet maıtalmandary baǵalaıtyn bolady.
Gúlshat SAPARQYZY.
