Sýret: instagram.com@madeniet_mangystau
Saıótes aýyldyq klýby bastaýyn 1965 jyly temirjol ǵımaratynan ashylǵan qyzyl buryshtan alady, atalǵan qyzyl buryshta kınozal jumys istedi. 1983 jyly qańtar aıynda arnaıy shtat berilip, aýdandyq mádenıet úıi janynan materıaldyq-tehnıkalyq bazasy jınaqtalyp, aýyl klýby ashyldy. Alpys jylǵa taıaý ýaqyttan beri baspanasy bolmaǵan mádenıet ujymy bıyl sý jańa ǵımaratqa qol jetkizip, tolaıym qýanyshqa keneldi.
Quny 691 mıllıon teńgege kelisim-shart jasaqtalǵan Saıótes aýyldyq mádenıet úıiniń qurylysyn merdiger «AS Qurylys» JShS júrgizdi. «Aýyl – el besigi» baǵdarlamasy aıasynda salynǵan jańa ǵımarattyń 200 oryndyq konsert zaly jáne úıirmelerge arnalǵan birneshe zaly bar. Ádisker, ansambl, hor, vokal, kórermen zaly, sahna, grımer, kostıýmer, bı, dombyra, qolóner úıirmeleri, jaryq-dybys stýdııalary men mamandarǵa arnalǵan kabınetter, konsert jáne úıirme zaldary qazirgi zamanaýı talapqa saı jabdyqtalǵan. Mańǵystaý aýdandyq ákimdigi mamandarynyń aıtýynsha, ǵımaratta aýyl kitaphanasy da ornalasqan.
«Klýbta 1983–2010 jyldar aralyǵynda án, dombyra úıirmelerimen 10 kórkemónerpaz jumys istegen bolsa, qazirgi tańda quramy 12 adamǵa tolyp, 131 kórkemónerpazy bar 6 qurylym halyqqa mádenı qyzmet kórsetip otyr. Saıótes aýyldyq klýby ujymyna jyl saıyn kásibı mamandar qosylyp, halyqtyń mádenı demalysyn uıymdastyryp keledi. Uzaq jylǵy tájirıbesi men kásibı biliktiliginiń nátıjesinde aýyldyq klýb janyndaǵy «Aqmarjan» analar ansambline, Saıótes dombyrashylar ansambli men «Nazqońyr» bı ansambline Mádenıet jáne aqparat mınıstriniń 2023 jylǵy maýsym aıyndaǵy buıryǵymen «Halyqtyq», «Úlgili» ataqtary berildi. 2015 jyldan bastap klýbtyń sapa quramy ádisker shtatymen tolyqty», deıdi aýyldyq klýb meńgerýshisi Kúlásh Jaıym.
Jańa mádenı nysan aýyl ajaryn arttyryp, ónerin óristete túseri anyq.
Mańǵystaý oblysy
