Apat 2023 jyldyń qazan aıynda bolǵan edi. Alǵashqy jarylys K2 qabatynan bólingen metannyń janýy nátıjesinde bolǵan. Gaz mehanıkalyq ushqynnan tutanyp, metan qospasynyń jumys istemeıtin aımaqta jarylýyna jáne shahta týnnelderindegi kómir shańynyń birneshe ret jarylýyna ákeldi.
«Jarylystyń taralý uzyndyǵy shamamen 6 km qurady», dep habarlady baqylaýshy organ.
Tergeý barysynda jumys uıymdastyrýda kelesi kemshilikter anyqtaldy:
- №6 ýchaskeniń ınjenerlik-tehnıkalyq qyzmetkerleri men Kostenko atyndaǵy shahta basshylary tarapynan qaýipti óndiristik faktorlardy tıisti deńgeıde baqylamaý;
- 2023 jyldyń qyrkúıeginde 48k3-batys lavasynda bolǵan oqıǵalardy tıisti dárejede teksermeý;
- Shańdy-jarylysqa qarsy is-sharalardy tıisti deńgeıde oryndamaý, nátıjesinde jer asty jumystary kezinde shań men gazdyń artýy, apat qaýpin joǵarylatty.
Tergeý nátıjesinde 10 kúdikti anyqtalyp, olardyń toǵyzy qamaýǵa alyndy. Olardyń qatarynda:
Sergeı Mýstıvko – shahta dırektory, shahtadaǵy taý-ken jumystaryn apatsyz jaǵdaıda ustaýǵa, óndiristik jáne órt qaýipsizdigi erejelerin saqtaýǵa, jabdyqtardy ýaqtyly jóndeýge jaýapty;
Nıkolaı Groznov – shahtanyń bas ınjeneri, óndiristik qaýipsizdik jaǵdaıyn baqylaý, shahtanyń gaz, shań jarylǵyshtyq jáne ken qabatynyń kenetten laqtyrý qaýpin anyqtaý mindetterine jaýapty;
Vadım Erıomın – óndiris boıynsha dırektordyń orynbasary, qaýipsiz jumys jaǵdaıyn jáne shahta jabdyqtarynyń senimdiligin qamtamasyz etýge jaýapty;
Dmıtrıı Fedorenko – tehnıka qaýipsizdigi boıynsha bas ınjenerdiń orynbasary, shahtadaǵy tehnıka qaýipsizdigin qamtamasyz etýge jaýapty;
Vladımır Shıshkanov – jeldetý jáne tehnıka qaýipsizdigi ýchaskesiniń bastyǵy, shahtadaǵy jeldetý jáne gaz rejımin qamtamasyz etýge jaýapty;
Vıtalıı Pestrıak – jeldetý jáne tehnıka qaýipsizdigi ýchaskesiniń shań-jarylysqa qarsy qorǵaý jónindegi kómekshisi;Vıktor Koptenkov – №6 ýchaskeniń bastyǵy, jeldetý, shań-gaz rejımi jáne órtke qarsy sharalardy qamtamasyz etýge jaýapty;
T. Gabdýshev – konveıerlik kólik ýchaskesiniń bastyǵy, shań-jarylysqa qarsy sharalardy oryndaýǵa mindetti;
Vladımır Gonnochenko – óndiris boıynsha bas ınjenerdiń orynbasary, óndiristiń ınjenerlik qamtamasyz etilýin baqylaýǵa jaýapty;
Dmıtrıı Kosar – shahtanyń bas mehanıgi, shahta jabdyqtarynda qaýipsiz jumys júrgizýdi qamtamasyz etpegeni úshin kúdikti dep tanylǵan.
Apattan 74 adam, sonyń ishinde qaza tapqandar men tiri qalǵan kenshilerdiń jaqyn týystary zardap shegýshi retinde tanyldy.
«Qazirgi ýaqytta kúdiktiler is materıaldarymen tanysyp jatyr. Is aıaqtalǵannan keıin qadaǵalaýshy prokýror arqyly sotqa joldanady», dep túıindedi Bas prokýratýra.
2023 jyldyń 28 qazanyna qaraǵan túni Kostenko shahtasynda 46 adamnyń ómirin qıǵan jarylys boldy. Qaıǵyly oqıǵa búkil Qazaqstandy dúr silkindirdi. Prezıdent Qasym-Jomart Toqaev qaza tapqandardyń otbasylaryna kóńil aıtyp, olardy jan-jaqty kómekpen qamtamasyz etýdi tapsyrdy.
