AIGA Chempıondar lıgasy – bizdiń elde negizi qalanyp, álemde keńinen tanymal bolǵan biregeı halyqaralyq týrnır. Úshinshi maýsymnyń júlde qory sporttyń bul túrinde buryn-sońdy bolmaǵan 1 000 000 AQSh dollaryn qurap otyr. Onyń formaty kórermenderge barynsha qyzyqty ári áserli bolatynyna esh kúmánimiz joq. Komandalar jeti salmaq dárejesinde «jekeleı qarsylaspen ıyq tiresip saıysý» qaǵıdasyna saı aıqasady. Alǵashqy eki jarys Túrkııa men Brazılııada uıymdastyryldy. Ol kezde fınaldyq kezeńge Anglııanyń «Euro Trash», Brazılııanyń «Kasai» komandalary ótti.
AQSh-taǵy týrnırde alty komanda eki topqa bólinip, bir-birimen kúsh synasty. Qyzyqty ári tartysty beldesýlerdiń nátıjesinde «CheckMat», «10th Planet» komandalary fınalǵa shyqty. Qos myqtynyń ózara tartysy «CheckMat» klýbynyń paıdasyna sheshildi. Degenmen «10th Planet» ujymy da federasııadan «wild card» alyp, kelesi kezeńge ótti. Sóz oraıy kelgende, AIGA Chempıondar lıgasy grepplıng álemindegi mártebesi asa joǵary ári eń bedeldi jarys ekenin atap ótken jón. Bul básekelerdiń tikeleı reportajy álemdegi jetekshi strımıngtik-servıs – «Flograpplingte» kórsetiledi.
Endi AIGA Chempıondar lıgasynyń tórtinshi irikteý kezeńi kelesi aıda Astanada uıymdastyrylady. Sol kezde jer-jahannyń basqa da azýly komandalary fınaldyq kezeńniń sońǵy joldamalaryn sarapqa salady.
