Sýret: ortcom.kz
Ony iske asyrýǵa bilim salasyn turaqty damytý qorymen qatar óńirdiń iri kompanııalary qatarynan demeýshiler qatysady. Nazarbaev zııatkerlik mektepteri men «Bilim-ınnovasııa» lıseı-ınternattary jobaǵa qatysý úshin iriktelgen 50 mekteptiń ozyq tájirıbesin jáne ádistemesin bólisedi.
NCOC, «QazMunaıGaz» AQ jáne «Halyq» jeke qaıyrymdylyq qory mektepterdi jaraqtandyrýǵa qoldaý kórsetti. Demeýshiler qatarynda 60 oqý synybyn jaraqtandyrýǵa qatysqan «Ordabasy Group» kompanııasy bar.
«Otpan» syndy jobalardy qoldaý arqyly biz erteńgi kúnniń mindetterin sheshýge qabiletti bilikti mamandardy tárbıeleý úshin qolaıly jaǵdaı jasaımyz. Bilim mekemelerin jańǵyrtý jáne pedagogter biliktiligin arttyrý balalarymyzdyń eń jaqsy bilim resýrstaryna qol jetkizýine jol ashady. Osy bastamanyń bir bóligi bolyp, elimizdiń zııatkerlik kapıtalyn damytýǵa úles qosýǵa qýanyshtymyz», deıdi «Ordabasy Group» kompanııasy basqarma tóraǵasynyń keńesshisi Jarmuhamed Appaz.
Sonymen qatar Tamara Dúısenova Aqtaýdaǵy «Otpan» jobasyna engizilgen eki mekteptiń qyzmetimen tanysty. Onyń sheńberinde №15 jáne №29 mektepterde materıaldyq-tehnıkalyq baza kúsheıtildi. Muǵalimder úshin olarda ártúrli taqyryptyq kýrs pen semınarlar uıymdastyrylady.
«Oblys ákimdigi mektepterdiń jóndeýine jaýapty boldy. Al demeýshiler pándik kabınetterdi jabdyqtady. «Otpan» jobasy ustazdar men oqýshylarǵa sapaly bilim isin uıymdastyrýda jaqsy múmkindik týǵyzyp jatyr. Bul bilim oshaqtary keıin ózge de orta bilim mektepteri úshin tirek mekemeleri bolmaq», dep atap ótti Tamara Dúısenova.
Oqýshylardyń ata-analary da kabınetterdi jabdyqtaýǵa qarajat bólgen demeýshilerge alǵys bildirdi. Sapar aıasynda óńir mektepteri basshylarynyń qatysýymen keńes uıymdastyryldy. Oǵan óńir basshysy Nurdáýlet Qılybaı qatysty. Kezdesý barysynda óńirdegi orta bilimdi damytý máseleleri talqylandy. Jumys sapary kezinde Tamara Dúısenova oblys ortalyǵyndaǵy «Balbulaq» balabaqshasy jumysymen tanysty. 300-den astam bala oqıtyn mekemede Montessorı, logoped, psıholog kabınetteri bar. Balabaqshada mektepke deıingi bilim máseleleri boıynsha keńes ótti.
О́ńirde bastaýysh mektep pen balabaqsha baǵdarlamalaryn sınhrondaý jumystary jalǵasyp jatyr. Mektepke deıingi bilim mekemelerimen qamtylmaǵan balalardyń ata-analary úshin konsýltasııalyq ortalyqtar jumys isteıdi. Bul jumys Mańǵystaý oblysynyń 169 balabaqshasynda qolǵa alynǵan.
Mektepke deıingi bilim mekemelerin sıfrlandyrý da basty nazarda. Kezdesý barysynda Taraz qalasynda qanatqaqty rejimde iske asyrylatyn qarjylandyrýdyń vaýcherlik ádisin engizý nátıjeleri tanystyryldy. Atalǵan júıe talaptarǵa saı keletin barlyq balabaqshany bıýdjettik qarjylandyrýǵa múmkindik berdi. Ata-analar mektepke deıingi bilimdi uıymdastyrýdy tańdaýǵa múmkindik aldy, ashyqtyq esebinen bıýdjet qarajatyn únemdeý júrip jatyr.
«Júıe óziniń tıimdiligin kórsetip otyr. Vaýcherlik qarjylandyrý ádisi Shymkent jáne Túrkistan qalalarynda engizilip jatyr. Ata-analar men balalardyń múddesine saı keletin júıe barlyq óńirde engizilýge tıis», dedi Tamara Dúısenova.
Memleket basshysy keler jyldy jumysshy mamandyqtary jyly dep jarııalady. Osy oraıda eldegi tehnıkalyq jáne kásiptik bilim salasyn transformasııalaý mindeti tur. Qazir kolledjderdi beıindeý jumysy júrgizilip jatyr. Negizgi maqsat – kásiptik bilim nysandaryn eń aldymen óńirler suranysyna qajetti kadrlardy daıarlaý ornyna aınaldyrý.
Jumys sapary aıasynda vıse-premer Mańǵystaý týrızm kolledjine de bardy. Onda dýaldy oqytý jobasyn paıdalana otyryp, qyzmet kórsetý salasyna mamandar daıarlanady. Kolledj túlekterge jumysqa ornalasý úshin jaǵdaı jasap, iri kásiporyndarmen, jergilikti jáne sheteldik qonaqúılermen belsendi jumys isteıdi. Kolledj bazasynda oqý oryndary basshylarynyń qatysýymen tehnıkalyq jáne kásiptik bilim salasyna qatysty máseleler talqylandy. Qazir kadrlardy daıarlaýdy 26 oqý orny júrgizedi. Túlekterdiń jumyspen qamtylý kórsetkishi 72 paıyzǵa jýyqtaıdy. Oblystaǵy tirek kolledjderi aıqandalyp, ózara tájirıbe almasý isi qolǵa alynǵan.
«Tehnıkalyq jáne kásiptik bilim baǵytynda birqatar shara qolǵa alyndy. Kolledjderdiń jumys sapasyna qatysty baǵalaý júrgizilip, olardy lıgalarǵa jikteý qarastyrylǵan. Oqý úderisine halyqaralyq standarttardy engizý qajet. Bul daıarlanatyn mamandardyń básekege qabilettiligin arttyrý úshin kerek. Halyqaralyq salalyq standarttardy engizgen, túlekterdiń basym bóligi sertıfıkattalǵan jáne ortasha eseppen joǵary mólsherde eńbekaqy alatyn kolledjderge yntalandyrýshy tólemder qarastyrylady», dedi Tamara Dúısenova.
Úkimet basshysynyń orynbasary 420 oqýshy bilim alatyn Aqtaý halyqaralyq mektebine de bas suqty. Oqytýshylardyń 80 paıyzy – elimizdiń ár aımaǵynan kelgen joǵary bilikti pedagogter. Oblysta «Jaıly mektep» ulttyq jobasy aıasynda 12 600 oryndyq 13 orta oqý ornyn salý josparlanǵan. Jeltoqsan aıynda árqaısysy 1 200 orynnan turatyn 3 nysan paıdalanýǵa beriledi. Qazir ǵımarattarda árleý jumystary júrgizilip jatyr.
