Taıaýda Tóke bıdiń týysy, alashtyń ardaqty aqyny Ǵafý Qaıyrbekovtiń uly, belgili qalamger ári kıno rejısseri Baqyt Ǵafý men aqynnyń inisi Ermek Sársenbaev atadan balaǵa mıras ıgi dástúrdi jalǵastyryp, Jankeldın aýdandyq kitaphanasyna óz qarjylaryna satyp alǵan 3 myńnan astam kitapty syıǵa tartty.
«Halqymyzda ejelden «Kitap – bilim bulaǵy, bilim – ómir shyraǵy» degen maqal bar. Demek, kitap bulaq bolsa, kitaphana – sol bulaqtyń elge yrys pen qut bereke ákeletin darııasy bolmaq. Memleket basshysy Qasym-Jomart Toqaev bıyl Ulttyq quryltaıda: «Kitaphana – memlekettiń, ulttyń negizgi jady. Elimiz úshin qundy tarıhı derekter men materıaldardyń deni kitaphanada saqtalady. Sondyqtan kitaphana isin damytýǵa beıjaı qaraýǵa bolmaıdy. Kitap oqyrmanǵa qoljetimdi bolýy kerek» dep aıryqsha atap kórsetti. Endeshe, Memleket basshysy belgilegen osy mindetti júzege asyrýǵa atsalysý – barshaǵa ortaq mindet. Ult ustazy A.Baıtursynuly da «Bilimniń basty quraly – kitap. Qazaq arasyna bilim jaıylýyna, áýeli, oqý úırenetin oryndar saıly bolýy kerek. Ekinshiden, bilim taratatyn kitaptar jaqsy bolarǵa kerek» degen edi. Bul – bizdiń osy qaǵıdattardy júzege asyrýǵa qosqan úlesimiz. Osymen toqtap qalmaı, aldaǵy ýaqytta da shalǵaı aýyldardaǵy kitaphanalarǵa kitap syılaýdy kózdep otyrmyz», deıdi Baqyt Ǵafý.
Demeýshiler syıǵa tartqan kitaptardyń basym bóligi «100 kitap» baǵdarlamasymen jaryq kórgen. Kitaptardyń ishinde qazaq ádebıetiniń ozyq týyndylary da barshylyq.
Qostanaı oblysy
