Mekteptiń ashylý rásimine oblys, aýdan basshylary, sala ardagerleri, aýyl turǵyndary, jańa mektepke qabyldanǵan balalar, ustazdar qatysty. Saltanatty jıynda bir jyldyń ishinde salynyp, el ıgiligine berilip otyrǵan jańa mekteptiń qurylysyna 5 mlrd teńge qarjy jumsalǵany, munda balanyń sapaly bilim alýyna qajet barlyq jaǵdaı qarastyrylǵany aıtyldy.
Saltanatty is-sharada sóz alǵan oblys ákiminiń orynbasary Rınat Muhametqalı kópshilikti quttyqtaı kelip, óńirde «Jaıly mektep» ulttyq jobasy aıasynda taǵy alty mektep ashylatynyn aıtty.
«Jalpy, bul ulttyq joba Memleket basshysy Qasym-Jomart Toqaevtyń tikeleı baqylaýynda jáne Prezıdent bıylǵy Joldaýynda orta bilimniń sapasy tabysty ult bolýdyń mańyzdy sharty ekenin, árbir oqýshynyń sapaly bilim alyp, jan-jaqty damýy úshin qolaıly jaǵdaı jasalýǵa tıis ekenin aıtqan bolatyn. 2025 jyldyń sońyna deıin oblysta segiz myń oqýshyǵa arnalǵan 11 zamanaýı mektep paıdalanýǵa beriledi. Onyń altaýy «Jaıly mektep» ulttyq jobasy sheńberinde salynady. Búgin Zarechnyı aýylynyń turǵyndary úshin 900 oryndyq memlekettik tilde oqytatyn jańa mektep esigin aıqara ashyp otyr. Qazirde atalǵan mektepke 500 astam bala qabyldandy. Bul mektepte jumys isteıtin muǵalimderdiń 60 paıyzdan astamy joǵary bilikti mamandar ekenin de aıta ketken jón», dedi Rınat Zákıuly.
Jańa mektep materıaldyq-tehnıkalyq jabdyqtalýy jaǵynan óńirdiń ózge mektepterine úlgi bolyp kele jatqan Nazarbaev zııatkerlik mektebi men «Bilim-ınnovasııa» lıseı-ınternatynan kem túspeıdi. Ulttyq jobaǵa sáıkes zamanaýı formatta salynǵan úsh qabatty ǵımarat bastaýysh, orta jáne joǵary býyndaǵy oqýshylar jeke-jeke oqıtyn derbes úsh blokqa bólingen. Ár bloktyń óz sport zaly bar. Mektepte 100-den astam oqý kabıneti jumys isteıdi. Fızıka, hımııa, bıologııa pánderi qabınetteriniń jeke zerthanalary bar. Robottehnıka kabınetteri men kompıýterlik synyptarǵa, STEM-zerthanalarǵa tolyqtaı eń sońǵy úlgidegi oqý qurylǵylary ornatylǵan. Oqý kabınetteriniń bári ınteraktıvti taqtamen, shet tilderi kabınetteri lıngafonmen jabdyqtalǵan.
Oqýshylardyń jan-jaqty damýyna jol ashatyn túrli sheberhanalar, ámbebap májilis zaly, kitaphana, úlken oqý zaly, oqýshylar men muǵalimderge arnalǵan kovorkıng zaldary, jyldamdyǵy joǵary ınternet – osynyń bári jaıly mektepte oqýshynyń sapaly bilim alýyna qajet dúnıeniń bári bar ekenin ańǵartyp tur. Jańa mektep múmkindigi shekteýli balalardyń bilim alýyna da jaıly ári qaýipsiz: pandýstar, tutqalar, kórý qabileti nashar oqýshylarǵa baǵdar kórsetetin belgiler, tablo, kórsetkishter bar.
Bilim oshaǵynda muǵalimder men tehnıkalyq qyzmetkerlerdi qosqanda 100 adam jumys isteıdi.
«Burynyraqta salynǵan mektepterde mundaı múmkindik bolmady ǵoı. Bizdiń mektepte, mysaly, ózge bilim ordalarynda joq STEM laboratorııasy, bıotehnologııa zerthanasy bar. Oqýshyny bylaı qoıyp, muǵalimderdiń ózderi sabaǵymyz qyzyqty ótetin boldy dep qýanyp jatyr. О́ıtkeni bizde muǵalimge de, oqýshyǵa da kerektiń bári bar», deıdi mektep dırektory Qarlyǵash Aldambergenova.
«Jaıly mektep» ulttyq jobasy aıasynda óńirde taǵy bes mektep salynyp jatyr. Onyń ekeýi – Qostanaıda, qalǵany Arqalyq, Rýdnyı qalalary men Áýlıekól aýyldarynda.
Qostanaı oblysy
