Foto:depositphotos.com
Úkimet otyrysynda Premer-mınıstr Oljas Bektenov Densaýlyq saqtaý mınıstrliginiń basshysyna «Elimizde múgedek balalar kóbeıdi, onyń sebebi nede jáne biz ne isteı alamyz?» dep surady.
Suraqqa jaýap bergen mınıstr sońǵy úsh jylda shynymen de balalar arasynda múgedektiktiń artqanyn rastady.
«Sońǵy úsh jylda balalar arasyndaǵy múgedektik 11 paıyzǵa artty. Týa bitken patologııalardy erte anyqtaý maqsatynda osy jyldyń 1 naýryzynan bastap 10 óńirde 23 myń áıelge tegin tekserý júrgizildi. Biz bul jumysty qalǵan aımaqtarda da atqaramyz», dedi Aqmaral Álnazarova.
Bul rette Densaýlyq saqtaý mınıstri óz baıandamasynda jańa týǵan náresteler men alty jasqa deıingi balalardaǵy múgedektik qaýpin erte anyqtaý úshin skrınıngtiń tórt túri júrgiziletinin atap ótti:
- Neonataldyq – bul jańa týǵan nárestelerge tuqym qýalaıtyn aýrýlardy anyqtaý men dıagnostıkalaý, emdeý úshin jasalady (osy jyldyń 9 aıynda 256 myńnan astam jańa týǵan náreste (98 paıyz) qamtyldy, 17 nárestede fenılketonýrııa, 3100 jańa týǵan nárestede týa bitken gıpotıreoz anyqtaldy);
- Aýdıologııalyq – estý qabiletiniń buzylýyn anyqtaý (jańa týǵan nárestelerdiń 96,3 paıyzy jáne 1 jastan 6 jasqa deıingi balalardyń 55 paıyzy qamtylǵan);
- Oftalmologııalyq – shala týylǵan nárestelerdegi retınopatııany anyqtaý (shala týylǵan náresteler 5590 (99,2 paıyz) qamtyldy, onyń ishinde 388 shala týǵan náreste (37,4 paıyz) kórsetkishteri boıynsha hırýrgııalyq emdeýden ótti);
- Psıhofızıkalyq – jańa týylǵan náresteler men 5 jasqa deıingi balalardaǵy psıhofızıkalyq damý buzylystaryn anyqtaý (obektilerdiń jalpy sanynan balalardyń 92 paıyzy (1 732 426) qamtyldy).
