Foto: parlam.kz
Depýtattyń aıtýynsha kvadroberler degenimiz – adam bolýdan bas tartyp, ıtshe, mysyqsha dybystap, kúndelikti ómirde janýarlarǵa uqsap tórt aıaqtap nemese janýar keıpindegi betperdemen júretin adamdar. Olar syrtqy keıpin ózgertip qana qoımaı, ıtter sekildi adamdarǵa shabýyldaǵan, ıaǵnı, tyrnaý, tisteý faktileri kezdesken. Bundaı oqıǵalar kórshi Reseı jáne О́zbekstan elderinde tirkelip úlgeripti. Bundaıdy balalyq qylyq dep qabyldaǵanmen, balalardyń psıhologııasy men áleýmettik damýyna keri áserin tıgizip, shekten shyǵyp barady. Bul – balalar men jasóspirimderge tónip turǵan qater.
«Batys elderinde balalar sabaqta sóıleýden bas tartyp, janýarsha dybystaýdy shyǵarǵan. Osy sýbmádenıet ókilderine arnap arnaıy keshter uıymdastyrylatyn bolǵan. Sonymen qatar, kvadrober bolýǵa qajetti zattardy satý jańa bıznes kózine aınalyp, ınternette joǵary baǵada satylyp jatyr», dedi Májilismen.
Dáýlet Tóleýtaıulynyń sózinshe, eń qorqynyshtysy – balalar atalǵan oıynnan psıhologııalyq zardap shegip, adam bolýdan qalady. Adamdyq problemalardan qashyp, janýar bolýǵa áýestenedi.
«Biz aldyn almasaq, urpaqtan aıyrylý aldynda turmyz. Bala boıyna adamdyq qundylyq uıalatýdyń ornyna, keri ketý prosesi alǵa shyqty», dedi ol.
Májilis depýtatynyń aıtynsha álem elderi dabyl qaǵyp, balalarǵa erekshe kóńil bólýge shaqyryp otyr. Balalardyń oǵan qyzyǵýshylyǵy baıqalsa, ata-analarǵa dereý áreket etýdi eskertip jatyr.
«Bul ata-ananyń ǵana emes, búkil qoǵamnyń jáne memlekettiń nazar aýdararlyq máselesi. Búginde Reseıde zań qabyldaý talqylansa, О́zbekstanda ata-anaǵa mindetterin durys oryndamaǵany úshin aıyppul salý máselesi qolǵa alynǵan. Atalǵan máselege áleýmettik jáne quqyqtyq tosqaýyl jasap, áleýmettik jelilerdi qatań baqylaýymyz qajet. Mundaı áleýmettik trendter jyldam etek alýyna baılanysty, shuǵyl áreketterdi talap etedi. Balalarymyzdyń bolashaǵy memleket pen qoǵamnyń jiti baqylaýynda bolýy kerek. Bizdiń elde de quzyrdy organdar atalǵan máseleni jan-jaqty zerttep, aldyn-alý sharalary boıynsha keshendi sharalar qabyldaýy tıis», dep túıindegen depýtat saýalyna jaýapty zańnamada belgilengen merzimde jazbasha usynýdy surady.
