Sýretti túsirgen – Valerıı Býgaev
Pavlodar oblysyndaǵy aýyl ákimderin saılaý úrdisi keler jyly da jalǵasady. О́ńirdegi aýyldyq okrýgterdiń údemeli damýy baıqalady. 355 aýyldyq eldi meken 126 derbes aýyldyq bıýdjetke biriktirilgen. Ortasha alǵanda, aýyldyq bıýdjettiń qarjylyq qamtamasyz etilýi 9 paıyzdy quraıdy jáne 90 paıyzǵa deıin joǵary turǵan bıýdjetterden sýbvensııamen, transferttermen óteledi. Bıyl oblystyq bıýdjetten 250-ge jýyq jobany iske asyrýǵa 6 mlrd teńgeden asa qarajat bólingen. Onyń ıgiligin oblystaǵy barlyq aýyldyń úshten biri kórdi.
– Bıyl óńirdiń 50-den asa aýylyna baryp, memlekettik baǵdarlamalar men ulttyq jobalardy iske asyrý boıynsha okrýg ákimderimen kezdestim. «Qýatty óńirler – qýatty el» – bul jaı ǵana uran emes, Ádiletti Qazaqstandy qurýdaǵy aıqyndaýshy formýla. Aýyl ákiminiń qyzmeti jumys kúnimen shektelmeıdi, al halyqpen jumys isteý tek qabyldaý saǵattarynan turmaıdy. Bárimizdiń aldymyzda turǵan ortaq maqsat – halyqtyń ómir súrý sapasyn arttyrý, óńirdi damytý. Bul – kúrdeli ári kópsalaly jumys, – deıdi óńir basshysy Asaıyn Baıhanov.
Aýyldardy damytý men jańǵyrtýǵa «Aýyl – el besigi» memlekettik baǵdarlamasy sep bolyp otyr. Bıyl 15 aýyl qamtyldy. Bul – sý qubyrlaryn, sport nysandaryn, mádenıet úılerin jóndeý, salý, aýyldardy abattandyrý, aýyldardyń kirme joldaryna asfalt tóseý. Al «Aýyl amanaty» jobasy bıyl jańa kásiporyndar ashýǵa, qaıta óńdeý múmkindikterin keńeıtýge, mal basyn kóbeıtýge, sondaı-aq 100-den asa jańa jumys ornyn ashýǵa múmkindik berdi. Keıingi 15 jylda alǵash ret bıznes pen memlekettiń ózara árekettestigi aıasynda halyqtyń áleýmettik osal toptarynan kezekte turǵandar úshin 800-den asa páter, onyń ishinde oblystyń 10 aýdanynda 313 páter satyp alyndy.
«Amanat» partııasy ortalyq apparatynyń basshysy Mádı Ospanov búgingi tańda ákimder el úmiti ekenin atap ótti.
– Ákimshilik reforma óz nátıjesin berip jatyr. Jergilikti jerdegi máselelerdi sheshý úshin ókilettikter ortalyq deńgeıden tómenge beriledi. Aýyl ákimderin saılaý saıası jańǵyrýdyń jańa kezeńi, sondaı-aq júrgizilip jatqan reformalardyń birizdiligi men tıimdiligin kórsetedi. Bul degenimiz, sizderde jergilikti turǵyndardan qoldaý bar ekenin bildiredi, aýyldy basqarýda ózderińizdiń jeke modelińizdi qurasyzdar. Kelesi jyly ákimderdiń saılaýy barlyq qala men aýdanda ótedi. Sonymen qatar bıýdjettik ortalyqsyzdandyrý júrgizilip jatyr. Jergilikti ózin ózi basqarýdyń qarjylyq derbestigin arttyrý qajet. Atap aıtqanda, úkimetke jańa bıýdjet jáne salyq kodeksterin ázirleý sheńberinde aýyl ákimderiniń bıýdjetti qalyptastyrý jáne qarajatty jumsaý tetigin qaıta qaraý tapsyryldy, – dedi M.Ospanov.
Atap ótelik, bıyl Ertis-Baıan óńirinde 30 aýyldyq ákimi saılanyp qoıyldy. Al keler jyly 33 aýyldyń ákimi saılanady dep kútilip otyr.
Pavlodar oblysy
