Sınoptıkterdiń málimetine qaraǵanda, aıdyń alǵashqy onkúndiginde aýanyń temperatýrasy 8 gradýsqa deıin salqyndaıdy. «Qazgıdromettiń» Soltústik Qazaqstan fılıalynyń basshysy Gúlzat Ǵazızovanyń aıtýynsha, aıdyń ekinshi onkúndiginde kúndiz 2-3 gradýs jylymyq bolǵanymen, túnde aýanyń temperatýrasy 9-14 gradýsqa deıin tómendeıdi. Úshinshi onkúndikte tipti mınýs 20-24 gradýstarǵa deıin sýytady.
Keshegi qatty boranda qar molynan tústi. Qalanyń kóp jerinde turǵyndar qozǵalysy da qıyndap qaldy. Tańerteńnen yshqyna soqqan boran tek tús qaıta tolastady. Qutyrǵan jel qardy keıbir joldar men aýlalarǵa qalyń qylyp úıip tastady. Jylymyq jerge túsip erigen qar lezde qatyp, kóktaıǵaq bolǵan tustar da kóp.
Túske deıin qar tazalaýǵa shuǵyl kirisip, turǵyndardyń júrip-turatyn joldaryn arshyp jatqan tehnıkalar da kórinbedi. Jýyrda ǵana «Qazavtojol» mekemesiniń basshylyǵy jol tazalaýǵa tehnıkalarymyz saqadaı saı, barlyǵy 328 tehnıka qar tazalaýǵa daıyn tur dep málimdegen edi. Degenmen qalanyń birshama aýdandarynda, ásirese «Soltústik», №19 shaǵyn aýdandarda qozǵalysta júrgen tehnıka kózge túspedi. Tek kommýnaldyq qyzmettiń adamdary ǵana qoldaryndaǵy quraldarymen joldardy ashyp júr.
Qalanyń keıbir mektepterinde ekinshi aýysymnyń sabaqtary qysqartyldy. Úıge kesh shyqqan oqýshylar boran qaıta tursa úılerine jetýi qıyn. Úıleri oqý ornynan alys ornalasqan balalar sabaqtardan bosatyldy.
PETROPAVL
