Oblys ákimi Ǵaýez Nurmuhambetov ansambldiń jetekshisi Olga Rostovshıkova men bıshilerdi laıyqty jeńisimen quttyqtady. «Ansambl músheleri talantta shek joq ekenin, sahnada jarqyraýǵa árkimniń de qabileti bar ekenin dáleldedi. Sizderdiń jumystaryńyz, tabandylyqtaryńyz jáne shynaıylyqtaryńyz bárimizdi shabyttandyrady, al kezekti jeńisterińiz – ónerdi órge aparatyn jandar úshin múmkin emes eshnárse joq ekenin kórsetti. Jaraısyzdar, biz árqaısyńyzben maqtanamyz! Alda tek jańa bıikter, budan da kóp jetistikter bolsyn!» dep jazdy óńir basshysy Ǵaýez Nurmuhambetov áleýmettik jelide.
Bul erekshe óner ujymy týraly biz «Egemenge» úsh ret jazǵan bolatynbyz. Olar birneshe alys sheteldegi dodalarǵa qatysyp, únemi jeńimpaz bolyp oralyp júr. Osy bıylǵy mamyr aıynda ǵana ansambl Fransııada ótken halyqaralyq festıvalǵa qatysyp, birinshi oryn alyp keldi. Túrli halyqaralyq bı festıvaldarynan ansambl osymen 18-gran-prı jáne túrli nomınasııa boıynsha 41-ret birinshi oryn alyp kelip otyr.
Eske sala ketetin bolsaq, ujymnyń ereksheligi sonda – onyń músheleri estı almaıtyn jandar. Sondyqtan sóıleı de almaıdy, naqty aıtqanda mylqaý jandar. Olardyń bári Petropavldaǵy estý qabileti kem balalarǵa arnalǵan ınternatta oqyǵan. Al jetekshileri Olga Rostovshıkova Ermek Serkebaev atyndaǵy daryndy balalarǵa arnalǵan óner kolledjinde horeografııadan sabaq bergen. Ol birde kembaǵal jandar ınternaty balalarynyń ónerge qushtarlyǵyn baıqap, jumysqa óz erkimen kirisken. Sodan beri (18 jyl) osy ınternattyń balalaryna bı úıretýmen aınalysyp keledi. Mektepti bitirgen eresekter toby qazir S.Muqanov atyndaǵy qazaq sazdy drama teatrynyń qasynda qosalqy trýppa bolyp jumys isteıdi. Al jasóspirimder men balalar toby áli ınternat qabyrǵasynda.
Bı úıretý óte kúrdeli jumys. Ol – sózsiz óner, tek mýzyka yrǵaǵymen dene qımyldary arqyly ózderiniń obrazdaryn ashady. Al «Sensitive» bıshileri mýzykany estimeıdi, ony tek jetekshileriniń qımyldy kórsetýi arqyly uǵyp, onyń kóńil kúıin, jan kúızelisi men qýanyshyn tanyp, lezde qabyldaıdy. Ansambl bolǵan soń bir bıshi emes, olardyń qımyldary da ártúrli.
Biz Olga Rostovshıkovanyń qalaı jumys isteıtinin kórdik. Ol shákirtteri sahnada bılep jatqanda ózi kórermen zalynyń ortasynda turyp, mýzykanttarǵa qaı notany alýdy kórsetip turatyn dırıjershe barlyq qımyldy mýzykaǵa sáıkes kórsetip, ózi de jantalasyp bılep turady eken. Bir bı aıaqtalǵansha qanshama qozǵalys jasaıdy. Bıshi – kóp, bul – jalǵyz, sondyqtan ár bıshiniń qımylyn kórsetýi kerek qoı. kúrdeli jumys ekeni kórinip tur. Biraq O.Rostovshıkovanyń aıtýynsha, shákirtteri shetinen talantty, munyń qımylyn emeýrininen tanyp, lezde oryndaıdy eken. «Olardyń qulaqtary estimegenimen, basqa túısikteri jaqsy damyǵan. Sondyqtan meni lezde uǵady», deıdi ol.
Osydan eki jyl buryn Olga Rostovshıkovaǵa «Qurmet» ordeni berildi. Onyń alǵan asýlaryna beriletin qurmetter áli de alda. О́z mamandyǵyn súıip, onyń qyr-syryn qajymaı-talmaı qulaǵy estimeıtin jandarǵa úıretip, el ónerine olja salyp júrgen adamnyń eńbegi laıyqty.
PETROPAVL
