«Aqmola oblysy ákiminiń ókimimen, Qazaqstan Respýblıkasy Prezıdenti Ákimshiliginiń kelisimi jáne qalalyq máslıhattyń maquldaýymen Ánýar Kúmpekeev Kókshetaý qalasynyń ákimi bolyp taǵaıyndaldy. Oblys ákimi Marat Ahmetjanov jańa ákimdi tanystyrý barysynda onyń tájirıbeli basshy ekenin, joǵary kásibı jáne uıymdastyrýshylyq qabiletterge ıe ekenin atap ótti», delingen oblys ákimdigi baspasóz qyzmetiniń habarlamasynda.
Marat Ahmetjanov atap ótkendeı, jańa ákimge turǵyn úı-kommýnaldyq sharýashylyq, avtomobıl joldary jáne qurylys salalaryndaǵy máselelerdi sheshý boıynsha belsendi jumys júrgizý qajet bolady. Sonymen qatar qazirgi ýaqytta qala ákiminiń basty mindetteriniń biri – jylytý maýsymyn oıdaǵydaı ótkizý jáne turǵyndardy sapaly aýyz sýmen qamtamasyz etý bolmaq.
«Alda sheshilýi tıis máseleler men júzege asyrylatyn jańa jobalar boıynsha aýqymdy jumys kútip tur. Sondyqtan jedel ári tıimdi sheshimder qabyldaý talap etiledi», dedi oblys ákimi.
