«Rixos Khadisha» qonaqúıiniń týrnır zalynda dúnıe júziniń eń úzdik 10 shahmatshy qyzy: grossmeısterler Tan Chjýnı (Qytaı, 2 551), Aleksandra Gorıachkına (FIDE, 2 533), Hampı Konerý (Úndistan, 2 530), Katerına Lagno (FIDE, 2 527), Elızabet Pets (Germanııa, 2 458) pen halyqaralyq sheberler Bıbisara Asaýbaeva (Qazaqstan, 2 487), Stavrýla Solakıdý (Grekııa, 2 439), Dıvıa Deshmýh (Úndistan, 2 501), Nýrgıýl Salımova (Bolgarııa, 2405), Bathýıagıın Mongontýýlar (Mońǵolııa, 2 344) aınalma júıesi boıynsha bir-birimen jarysqan bolatyn.
Saıystyń jabylý saltanatyna Shymkent qalasy ákiminiń birinshi orynbasary Qýanysh Asylov, «KazChess» birinshi vıse-prezıdenti Dármen Sádýaqasov, FIDE men federasııanyń bas seriktesi – «Freedom Holding Corp.» kompanııasynyń ókilderi qatysyp, júldegerler men Gran-prıge qatysýshylardyń aldaǵy isterine sáttilik tiledi.
«Búgin biz halyqaralyq áıelder shahmat týrnıriniń sátti aıaqtalýyna kýá boldyq. Bul jarys tek sporttyq báseke emes, áıelder shahmatyn damytýdyń, jańa talanttardy ashý men ózara dostyq qarym-qatynas ornatýdyń alańyna aınaldy. Barshańyzǵa, ásirese jeńimpazdarǵa, adal kúresip, tamasha nátıje kórsetkenderińiz úshin zor alǵysymdy aıtamyn. Árbir qatysýshynyń eńbegi men tabandylyǵy bizge naǵyz úlgi-ónege boldy. Osyndaı týrnırler shahmat áleminde myqtylar men jańa talanttardy týdyratyny sózsiz», dep atap ótti Q.Asylov.
Áıelder arasyndaǵy FIDE Gran-prıi saıysynyń aqshalaı júlde qory da qomaqty. Alty kezeńniń árqaısysynyń júlde qory 80 000 eýroǵa teń. Onyń ishinde birinshi oryn alǵan shahmatshyǵa 18 000 eýro tabys etiledi. Al ekinshi orynnyń júldesi 13 000 eýrony quraıdy. Bul synda úshinshi oryn alǵan Bıbisara Asaýbaeva 9 500 eýro aqshalaı júldemen marapattaldy. Búkil týrnır serııasynyń jalpy júlde qory – rekordtyq 600 000 dollardy qurasa, onyń 120 000 dollary jalpyesepte úzdik bolǵan on oıynshyǵa úlestiriledi. Klassıkalyq shahmatta Gran-prı týrnıri aqshalaı júldesimen ǵana emes, reıtıngti joǵarylatýǵa múmkindik beretin ereksheligimen de asa mańyzdy. Buǵan qosa, úmitkerler Gran-prı serııalarynda jeńiske jetken jaǵdaıda álemdik shahmat tájin ıelenýge múmkindik syılaıtyn «FIDE Women’s Candidates 2026» týrnırine joldama alady.
