Jumysyn 2019 jyldyń jeltoqsanynan bastaǵan kompanııa negizinen astyq jınaý kombaındaryn shyǵarady. Bólshekterdiń kóbin «KZ «Rostselmash» pen «Klever» kompanııalarynan alady. «Vector 410», «Acros 550» astyq kombaındarynyń birneshe túrin usynady. Shaǵyn jáne orta qýatty «YTO-X904», «YTO-X1304» traktorlaryn da qurastyrady. Daıyn tehnıkalar «QazAgroFınans» jáne «О́nerkásipti damytý qory» arqyly astyqty alqapta el yrysyn molaıtyp jatqan dańǵaıyr dıqandarǵa jetkiziledi.
– Eginshilik mádenıetin jetildirip, tehnologııany tap-tuınaqtaı atqarýyń úshin qolda bar tehnıka úzdiksiz júrip turýy kerek, – deıdi Zerendi aýdanyndaǵy «Qulan» sharýa qojalyǵynyń agronomy Maǵjan Qulanuly, – Ákem sharýa qojalyǵyn qurarda joqtan bar jasap, kúresinde qalǵan keńes zamanyndaǵy eski tehnıkasynyń qańqasynan jınap, qareket etken bolatyn. Bir kún júrse, eki kún toqtap turatyn ondaı tehnıkamen jumys isteý qazir múmkin emes. Sońǵy jyldary aýa raıy múldem ózgerip ketti. Oıǵa alǵan sharýany sátimen sabaqtaýǵa qojalyqtyń mashına-traktor parkin zaman talabyna saı jańǵyrtýǵa umtylyp jatyrmyz. Jańanyń aty jańa, bıylǵydaı jaýyn-shashyn kóp bolǵan jyly kóktemgi egiste de, kúzgi oraqta da jiti qımyldap úlgerdik. Mundaı nátıjege memleket tarapynan kórsetilgen qoldaý septigin tıgizip otyr.
Dıqandar kóńilinen shyǵyp otyrǵan zamanaýı astyq kombaındary men traktor daıyndaıtyn kompanııanyń óndiris alańynda qajetti metalldardy kesip, ıip, óńdep, boıap, keptiretin, dánekerleıtin zamanaýı stanoktar bar. Osy múmkindiktiń arqasynda kásiporyn jylyna 5 túrli kombaınnyń 1 000 danasyn, jatkanyń 760-yn, odan ózge de sharýashylyqqa qajetti júzdegen qurylǵy shyǵara alady. Osy jumysty qolǵa alǵannan beri 2 012 astyq kombaınyn, 959 traktor, 1 526 jatka jáne ózge de aýyl sharýashylyǵyna qajetti qurylǵylardy shyǵarypty. Aýyl sharýashylyǵy qurylymdarynyń suranysyna oraı traktordyń 9 túrin shyǵarýdy qolǵa alǵan. Qazir bıik maqsat birshama oryndalyp, qýaty árqıly 7 túrli jańa traktor úlgisi qurastyrylyp jatyr.
Kásiporyn sharýa qojalyqtaryna óz ónimderin tikeleı de satady. Shaǵyn sharýashylyqtardyń múmkindigin eskerip, tehnıkanyń qoljetimdi bolýyn da qadaǵalaıdy. Bul aradaǵy basty sebep – básekelestik. Suranysty óteý úshin óndiris kólemin arttyra túsý kerek. 2024 jyly №3 sehtyń qurylysyn qolǵa alýdy josparlap otyr. Sondaı-aq metall óńdeýge zamanaýı stanoktar da qajet. Al daıyn tehnıkany oblys ortalyǵynyń shyǵa berisi men Kókshetaý-Shýche baǵytyndaǵy kúre joldyń boıyna ornalasqan dıllerlik ortalyqtarda sharýalardyń nazaryna usynady.
Ortalyqta jańa tehnıkanyń bar múmkindigi tegis kórsetilmek ári tehnıkany kútip-baptaý jaıyn da bilikti mamandar uǵyndyrmaq.
– Kóktemgi jáne kúzgi dala jumystarynyń ýaqtyly, tyńǵylyqty atqarylýy qýatty tehnıkaǵa baılanysty, – deıdi oblystyq Aýyl sharýashylyǵy jáne jer qatynastary basqarmasynyń basshysy Kenesh Álimjanov, – Bıyl kúzgi oraq naýqanynda óńir dıqandary 8,9 myń astyq kombaınyn paıdalandy. 4,8 myńy – zamanaýı joǵary ónimdi tehnıka. Bir jaqsysy, bıyl aýyl sharýashylyǵy qurylymdary jalpy quny 28,5 mlrd teńge bolatyn 246 traktor, 115 kombaın satyp aldy. Jeńildetilgen nesıe arqyly 80 traktor, 140 kombaın, 25 ártúrli qurylǵy alyndy.
2020-2021 jyldary jaman tumaý órshigen tusta kompanııa óńirdegi aýyl sharýashylyǵy salasynyń úzdiksiz jumys isteýine aıtarlyqtaı qolǵabysyn tıgizdi. Áleýmettik jaýapkershilikti jaqsy sezingen ujym tehnıkamen qatar, materıaldyq kómek te kórsetti.
Kompanııa eńbekti qorǵaý máselesin nazardan tys qaldyrmaıdy. Kásiporyn jumysshylary áleýmettik jaǵynan tolyq qamtamasyz etilgen. Alǵashqy kezeńde 77 adam, qazir 175 adam turaqty jumysqa ornalasqan. Árbir jumysshymen jeke kelisimshart jasalady. Onda tegin medısınalyq qyzmet kórsetý, densaýlyǵyn qadaǵalaý, dári-dármekpen qamtamasyz etý kórsetilgen. Jumysshylar tegin tamaqtanady, jumys ornyna kompanııa kóligimen tasymaldanady.
Taǵy bir jaqsylyǵy – jergilikti kásibı bilim beretin oqý oryndarymen baılanysyn nyǵaıtqan. Jas mamandardy tájirıbeden ótkizip, turaqty jumysqa ornalasý máselesin de sheshedi.
Beıneti bes batpan dala jumystarynyń bel ortasynda júrgen dıqan qaýymynyń eń basty tilegi – bes qarýynyń saı bolýy. Onyń biri ári biregeıi – sapaly tehnıka. Qalǵany ortaq iske degen ynta-yqylas. Yryzdyq jolyndaǵy qalyń qaýymdy zamanaýı tehnıkamen qarýlandyryp otyrǵan kásiporynnyń oń isi atap aıtýǵa turarlyq.
Kókshetaý
