Beıneýde tuńǵysh ret zaman talabyna saı aýdandyq kitaphana men jańa kınoteatr ashylady. Qazir sońǵy daıyndyq jumystary júrip jatqan kınoteatr jaqyn kúnderi saltanatty jaǵdaıda turǵyndar ıgiligine usynylady. Aýmaǵy 400 sharshy metr bolatyn kınoteatr ǵımaraty 180 orynǵa arnalǵan. Mádenıet oshaǵyna mansap ortalyǵy arqyly jumyssyzdyq kezeginde turǵan 10 adam jumysqa alynady.
Taǵy bir jarqyn jańalyq – aýdandaǵy alǵashqy zamanaýı kitaphananyń qurylysy. Bul joba Memleket basshysy Qasym-Jomart Toqaevtyń jastardyń kitapqa degen qyzyǵýshylyǵyn arttyrý jónindegi tapsyrmasy aıasynda júzege asyp jatyr. Kólemi 825 sharshy metr bolatyn eki qabatty ǵımarat bir mezette 62 adamdy qabyldaı alady. Ǵımaratta oqýshy balalarǵa, eresekterge, múmkindigi shekteýli adamdarǵa arnalǵan 5 oqý zaly, kitap saqtaý qoımasy men ınternet jelisimen jabdyqtalǵan arnaıy kabınetter bar. Jańa kitaphana ǵımaraty iske qosylatyn ýaqyt ta alys emes, 2025 jyldyń birinshi jartyjyldyǵyna belgilengen.
Bul ıgi shara 218 123 dana kitap qoryn qamtıtyn, 62 qyzmetker jumys isteıtin Beıneýdiń qazirgi kitaphanasyna zor qoldaý. Bıylǵy jyldyń on aıynda kitaphanaǵa 89 myń adam kelip, olardyń 26 765-i turaqty oqyrman retinde tirkelgen.
Úlken aýyldaǵy 154 kósheniń 66-syna asfalt tóselgen. Qazirgi tańda turǵyndarǵa qolaıly jaǵdaı jasaý maqsatynda 127 kóshe jaryqtandyrylyp, tozyǵy jetken 553 dana elektr baǵanasy aýystyrylyp jatyr. 108 mln teńgeni quraıtyn joba aıasynda aýyl kóshelerine 589 dana jaryq sham ornatyldy. Aldaǵy ýaqytta Beıneý aýdanyna qarasty basqa da eldi mekenderdegi kóshe shamdaryn kezeń-kezeńimen jańalaý josparlanyp otyr.
Bıyl aýylda 18 jańa qoǵamdyq kólik paıdalanýǵa berildi. Jolaýshylar avtobýstary qozǵalys kezinde turǵyndardyń qaýipsizdigi men jaılylyǵyn tolyq qamtamasyz etetin zamanaýı qural-jabdyqtarmen jabdyqtalǵan ári halyqaralyq ekologııalyq standarttarǵa saı jasalǵan, qorshaǵan ortaǵa zııanyn tıgizbeıdi, elektrondy jol aqysyn tóleý júıesi de bar.
Beıneýde áleýmettik az qamtylǵan otbasylarǵa arnalǵan jańa úıler salynyp jatyr. Respýblıkalyq bıýdjetten bólingen 284 mln teńgege jyl sońyna deıin 20 úıdiń qurylysy aıaqtalyp, turǵyn úı alý kezeginde turǵan halyqtyń áleýmettik jaǵynan osal toptaryna jatatyn azamattarǵa beriledi. El aýzynda «berekeli Beıneý» atanǵan óńirde qolǵa alynǵan ıgilikti jumys júıeli jalǵasa beredi.
Mańǵystaý oblysy
