Sýretti túsirgen – Erlan OMAR, «EQ»
Astanadaǵy «Erekshe múmkindikter ortalyǵynda» «Shoýdaýn» zaǵıp jandar federasııasy» respýblıkalyq qoǵamdyq birlestiginiń uıymdastyrýymen sportshylardy dodaǵa attandyrý saltanaty ótti. Kóz janarynan aıyrylǵan sportshylardyń halyqaralyq týrnıri 19 qarashada máresine jetpek. Sport Qory elimizden baratyn qatysýshylarǵa qarjylaı qoldaý kórsetip otyr.
El senimin arqalap, halyqaralyq tartysqa attanǵan sportshylardy shyǵaryp salý is-sharasyna Astana qalalyq sport basqarmasynan, «Astana» áleýmettik kásipkerlik korporasııasynan, Dene múmkindigi shekteýli tulǵalarǵa arnalǵan sportty daıarlaý ortalyǵynan, «Amanat» partııasynyń fılıalynan ókilder qatysyp, sáttilik tiledi.
«Shoýdaýn» zaǵıptar ústel tennıs federasııasy» respýblıkalyq qoǵamdyq birlestigi 2022 jyly qurylǵan. Eki jyldyń ishinde federasııa jumysy jandanyp, búginde 200-den asa kórý qabiletinen aıyrylǵan jandar shoýdaýn ústel tennısimen turaqty shuǵyldanady. Zaǵıp jandar arasynda salamatty ómir saltyn qalyptastyryp, múmkindigi shekteýli jandardyń sportpen shuǵyldanýyna jol ashýǵa kúsh salyp kelemiz. Shveısarııada ótetin halyqaralyq týrnırge sportshylarymyz qatysyp baǵyn synasa, biz týrnırdi uıymdastyrý, damytý barysy jaıynda tájirıbe almasamyz. Bul sport túrin damytý arqyly elimizdegi kórý qabiletinen aıyrylǵan jandardyń bir aýyq sergýine, qımyl-qozǵalysyn jaqsartýyna serpin beremiz», deıdi federasııa prezıdenti Serik Júzbaı.
Shveısarııada ótetin «Zurich Open» halyqaralyq týrnırine qatysýshylar byltyrǵy el chempıonatynda iriktelgen. Quramanyń bas bapkeri Azamat Baımaǵambetov elimizde endi órken jaıǵan sport túri álemde qarqyndy damyǵanyn alǵa tartty. Sondyqtan da júlde oljalaý ońaı bolmaıtynyn eskertti. «El birinshiliginde sheberligin kórsetip, úzdik shyqqan Gúlsara Qattabekova, Aıdar Satashev, Vlada Bartýseevıch, Kerim Beksyrǵaulyna senim artamyz. Komandanyń kapıtany Kerim bastaǵan shákirtterimiz baryn salyp, úmitti aqtaıdy dep bilemiz», dedi bapker.
Kanadalyq Djo Lıýıs pen Patrık Iork oılap tapqan, ústel tennısi men hokkeı elementterin biriktiretin ústel oıyny 1960 jyldan bastap qarqyndy damyp keledi. Bul oıyn túriniń ereksheligi – kózge arnaıy tańǵysh kıedi. Iаǵnı kózi kórmeıtin jandar da, kórý qabileti nashar zaǵıptarǵa da teń múmkindik beriledi. Estý qabileti arqyly tartysqa túsetin jandar erkin qımyl-qozǵalysty da nyǵaıtady. Shoýdaýn sporty elimizde keń qanat jaıyp, 16 oblysta fılıaly ashylyp, qatysýshylar qatary da arta tústi. Zaǵıp jandar sportta óziniń myqtylyǵyn, sheksiz múmkindikke ıe ekenin shoýdaýn sport túrimen shuǵyldaný arqyly da áıgileıdi. Keleshekte bul sport túri jazǵy Paralımpııa oıyndarynyń baǵdarlamasyna enýi múmkin.
