Sýret: ru.freepik.com
«Sandyqtaý» JShS dırektory Jamul Mushanov jaldamaly maýsymdyq qyzmetkerlerdiń áleýmettik aýdarymdaryna qatysty máselege nazar aýdardy. Shyntýaıtynda, bul jalǵyz osy seriktestikke emes, kóptegen aýyl turǵynyna qatysy bar jaıt. Búginde jumys berýshiler mindetti áleýmettik medısınalyq saqtandyrýǵa qyzmetker eńbekaqysynyń 3 paıyzyn, jaldamaly qyzmetkerler úshin 2 paıyzyn tóleıdi. Alaıda aýyl turǵyndary – negizinen aýyl sharýashylyǵymen aınalysatyn maýsymdyq jumysshylar. Olarda jyl boıǵy turaqty tabys joq.
– Dala jumysy kóktemgi jáne kúzgi maýsymda júrgiziletindikten, jumysshylar qysqy maýsymda jumyssyz qalady. Mine, osy kezeńde olar úshin áleýmettik aýdarym júrgizilmeıdi. Saldarynan medısınalyq uıymdar qyzmet kórsetýden bas tartyp jatady, – dep shaǵymdanady agrarshy.
О́ńirlik palata dırektory Erqanat Musylmanbek: «Atameken» ulttyq kásipkerler palatasyna aýyl turǵyndarynyń áleýmettik esepteýlerin saralaýǵa qatysty zańnamaǵa ózgerister engizý týraly usynys jiberemiz», dedi. «Hamze» sharýa qojalyǵynyń basshysy Erjan Bıekenov elevator máselesin alǵa tartty.
– Ereımentaý aýdanynyń Erkinshilik aýylynda elevator jumys istemeıdi, sol sebepti astyq qabyldaý júrgizilmeıdi. Elevatordyń jaǵdaıy múshkil, kásiporyn ıelerinen keri baılanys joq. Elevator jumysyn jandandyrýǵa qatysty jergilikti kásipkerler nıet bildirip te otyr, alaıda jergilikti atqarýshy organdar tarapynan túsinistik pen qoldaý baıqalmaıdy, – dedi fermer.
Elevatorlar tarapynan josyqsyz qyzmet kórsetý máselesin «Kenesary bıdaı» JShS dırektory Qýanyshbek Ibraev jalǵastyrdy. Aıtýynsha, Býrabaı aýdanynyń agrarshylary elevatorda astyqty saqtaýǵa tapsyrý kezinde qıyndyqtarǵa tap bolǵan. Sebebi astyqtyń sapalyq kórsetkishterin tómendetý faktileri bar. Jergilikti jerlerde memlekettik standarttar qoldanylmaıdy, sondyqtan astyq sapasy jasandy túrde tómendeıdi.
Fermerlerdi tolǵandyratyn negizgi másele – astyqty satý. Oblysta 6,6 mln tonnadan astam rekordtyq astyq jınalǵanyna qaramastan, kóptegen agrarshy ónimin sata almaı otyr.
– Dıqandar mán-jaıdy túsinedi. Azyq-túlik korporasııasyna ónim berýge daıyn. Alaıda qoldanystaǵy tetikter astyqty tikeleı satyp alýdy kózdemeıdi. Sonymen qatar sharýalardyń nesıe mindettemeleri bar, – dedi О́ńirlik keńes tóraǵasy Qýanysh Raqyshev.
Oblys ákiminiń orynbasary Murat Balpan barlyq aıtylǵan túıtkildi máseleni jergilikti ýákiletti organdar nazarǵa alatynyn aıtty. «Bizdiń tarapymyzdan jan-jaqty qoldaý kórsetiledi. Biraq aýyl sharýashylyǵy óndirýshileri Azyq-túlik korporasııasy aldyndaǵy qolda bar mindettemelerdi merziminde oryndaýǵa tıis», dedi M.Balpan.
Kókshetaý
