Kollajdy jasaǵan – Qonysbaı ShEJIMBAI, «EQ»
Baqylaý oryndary jarııa etken derekke súıensek, oblys kóleminde menshikke qarsy jasalǵan árbir ekinshi qylmys alaıaqtyqqa jatady eken. Ásirese ınternet alaıaqtyq órship tur. Atalǵan qylmystyń deńgeıi 12 paıyzǵa ósken.
Oblys prokýrory Berik Ábilovtiń tóraǵalyǵymen ótken qadaǵalaýshy organdardyń keńeıtilgen alqa otyrysynda urlyq pen alaıaqtyqtyń aldyn alý men atalǵan qylmys túrlerin ashý joldary talqylandy. Jıynda alaıaqtarǵa aldanǵan azamattarǵa, bıznes nysandaryna 1,6 mlrd teńge, onyń ishinde ınternet-alaıaqtyqtan 116 mln teńge zalal kelgeni aıtyldy. Máselen, jyl basynan beri ınternet alaıaqtyqtyń 135 deregi anyqtalyp, 40 kúdikti ustalǵan. Sondaı-aq alaıaqtyq áreketke qatysy bar 3 dropper qylmystyq jaýapkershilikke tartylyp, 10 myńǵa jýyq ınternet-resýrs buǵattalǵan.
Búginde óńirde atalǵan qylmystyń aldyn alý sharalary júrip jatyr. Kópshilik oryndarda jurtty alaıaqtardan saqtanýǵa úndegen bılbord, led-ekrandar kóbeıdi. Qala kóshelerinde turǵyndarǵa osy mazmundaǵy býkletter men paraqshalar taratyp júrgen belsendi jastardy da jıi ushyratasyz. Quzyrly oryndardyń ókilderi túrli eńbek ujymdaryn aralap, túsindirý jumystaryn júrgizip jatyr.
Prokýrorlardyń aıtýynsha, sot arqyly dropperlerden azamattyq tártippen múliktik zalal óndirip alý tájirıbesi qalyptasqan. Mysaly, bıyl 36 dropperden 71 mln teńge sot arqyly óndirilip alynǵan.
«Oblys ákimdigi alaıaqtyqqa qarsy kúres sharalaryna materıaldyq-tehnıkalyq turǵydan barynsha qoldaý kórsetip otyr. Máselen, Polısııa departamentiniń «Kıberpol» bólimshesin arnaıy baǵdarlamamen qamtamasyz etti», deıdi prokýrorlar.
Alqa jumysynyń qorytyndysynda oblystyń qadaǵalaý oryndary men quqyq qorǵaý organdarynyń aldaǵy ýaqytta alaıaqtyqqa qarsy birlesip atqaratyn is-sharalary aıqyndaldy.
Qostanaı oblysy
