Mundaı súıemeldeýge ıe bolǵan ınvestordyń biri – Ekibastuz óńirinde jańa ferroqorytpa zaýytyn salyp jatqan «EkibastuzFerroAlloys» JShS. Investorlar jobaǵa 92 mlrd teńge ınvestısııa quıǵan.
«Pavlodar óńirindegi jańa ferroqorytpa zaýytynyń qurylysy támamdalýǵa jaqyn. Qazirgi ýaqytta iske qosýǵa daıyndyq jumystary bastalyp ketti. Jylyna 240 myń tonna ferroqorytpa beretin óndiris ornynyń ónimi 100 paıyz eksportqa baǵyttalǵan. О́nimdi 52 memleketke, sonyń ishinde Eýropa, Amerıka, Ońtústik Azııa elderine jiberý kózdelip otyr», deıdi «EkibastuzFerroAlloys» JShS bas dırektory Madııar Danııarov.
Onyń aıtýynsha, keıingi ýaqytta prokýratýranyń ınvestısııalyq keıster máselesin sheshýmen belsene aınalysyp jatqany ınvestorlardy aıryqsha qýantyp otyr. Investısııalyq jobalarda qandaı da bir másele kezikse, barlyq múddeli tarapty, memlekettik organdardy ashyq alańǵa shaqyryp, ózekti máselelerdiń túpkilikti sheshilýine yqpal etedi.
«Bizdiń jobamyz asa aýqymdy bolǵandyqtan, zaýyt qurylysy barysynda kóptegen máselege keziktik. Mysaly, bolashaq óndiris ornyna temirjol qurylysyn júrgizý kerek boldy. Biraq ol bastapqyda óte baıaý júrdi. Prokýrorlar aralasqan soń, másele jyldam sheshilip kete bardy. Endi birde qurylǵylardy jetkizip, ornatyp beretin sheteldik mamandardyń elimizge ýaqytynda kelip-ketýine qatysty problemalar týyndady. Shetten keletin mamandardyń elde bolýyna qatysty belgili bir merzim men resimder bar. Bizge ákelinetin qural-jabdyq kóp bolǵandyqtan, olardy quratyn sheteldik mamandar sany da aýqymdy. Olar boıynsha tıisti organdarǵa jibergen ótinish, hattarymyz jatyp qalmaı ma, jabdyqtarymyz turyp qalmaı ma degen qaýippen prokýratýraǵa habarlastyq. Quzyrly organ mamandary jedel túrde tıisti mekeme men uıymdar ókilderiniń basyn qosyp, ortaq mámile jasaldy. Sóıtip, shaqyrtqan mamandarymyz ýaqytynda keldi», deıdi M.Danııarov.
Kásiporyn basshysy ınvestısııa salasynda biraz jyl áreket etip kele jatqanyn, bul tarapta sheteldik ınvestorlarǵa da qolushyn sozǵanyn atap ótti. Endi bul iske prokýratýranyń aralasýy ınvestısııalyq jobalardyń jyldam júrýine yqpal etip otyrǵanyn jetkizdi. Aıtyp óteıik, «EkibastuzFerroAlloys» JShS-ǵa qarasty zaýyt bıyl jyl sońyna deıin paıdalanýǵa berilip, onda 800-ge jýyq turaqty jumys orny qurylady degen jospar bar.
Oblystyq prokýratýra ókilderiniń sózine qulaq túrsek, bızneske keltiriletin kedergiler ártúrli. Kóbi zańnamaǵa qatysty. Jasandy kedergiler oılap tabý, bıýrokrattyq is-áreket nemese jaýapty organdardyń áreketsizdigi (qulyqsyzdyǵy) ınvestorlardy quzyrly organdarǵa shaǵymdanýǵa májbúr etedi.
«Pavlodar oblysy prokýratýra organdarynyń qadaǵalaý qyzmeti barysynda jyl basynan ınvestorlardyń 22 problemalyq keısine ruqsat berildi. Olar boıynsha jalpy ınvestısııa somasy 1 trln teńgeden asty. О́tinishterdiń basym bóligi jer, sáýlet-qala qurylysy zańnamasyn buzý jáne tehnıkalyq sharttardy alý máselelerimen kelip tústi. Negizinen prokýratýra organdaryna Pavlodar, Ekibastuz jáne Aqsý qalalarynan ınvestorlar júgindi», dep habarlady óńirlik prokýratýra.
Pavlodar oblysy,
Ekibastuz qalasy
