Fotolar: primeminister.kz
Áleýmettik jobanyń maqsaty elimizdiń ońtústik óńirlerinen kelgen jastardy oqytyp, kadr jetispeýshiligi baıqalyp otyrǵan Qazaqstannyń soltústik, ortalyq, shyǵys aımaqtaryna jumysqa ornalastyrýǵa baǵyttalǵan.
Oblys ákimderiniń orynbasarlary joba aıasynda atqarylyp jatqan sharalar týraly aıta kele, sheshýdi qajet etetin máselelerdi ortaǵa saldy. Vıse-premer baǵdarlamany júzege asyrýdaǵy negizgi másele jaýaptylardyń naqty, adrestik jumysynyń joqtyǵy ekenin atap ótti. Jobada qamtylatyn jastar anyqtalǵanymen, aımaqtardaǵy jumys berýshilerge naqty qandaı mamandyqty meńgergen kadrlar qajet ekeni naqtylanbaǵan.
«Bul máseleni sheshý úshin Ǵylym jáne joǵary bilim mınıstrliginiń janynan respýblıkalyq jobalyq keńse jáne kadrlarǵa qajettilikti naqtylaý úshin jumys berýshilermen, jumyspen qamtý ortalyqtarymen, ýnıversıtettermen jáne kolledjdermen ózara is-qımyl jasaıtyn óńirlik keńseler quryldy. Oqýdy bitirgennen keıin mindetti túrde jumysqa ornalasatyn mamandardy daıarlaý úshin naqty oqý oryndaryn tańdaý mańyzdy qadam bolady», dep atap ótti Tamara Dúısenova.
Respýblıkalyq jobalyq keńsege Parlament depýtaty Murat Ábenov, al óńirlik ofısterge oblys jáne Astana, Almaty, Shymkent qalalary ákimderiniń orynbasarlary jetekshilik etedi. Ońtústik aımaqtarda kásibı baǵdarlaý isine erekshe mán beriletin bolady. Búginde salalyq mınıstrlikpen Túrkistan, Jambyl, Almaty, Qyzylorda, Jetisý oblystarynyń mektepteri men kolledjderiniń tizimi anyqtaldy. Baǵdarlama aıasynda osy óńirlerdiń jastaryn Aqmola, Pavlodar, Qostanaı, Shyǵys Qazaqstan, Soltústik Qazaqstan, Abaı, Qaraǵandy, Ulytaý óńirlerinde oqytyp, jumyspen qamtý qarastyrylǵan.
