Aıta ketsek, 1998 jyly qurylǵan «Eýrazııa» kınofestıvali – Qazaqstandaǵy eń iri kınoforým jáne halyqaralyq kınoprodıýserler qaýymdastyqtary Federasııasy (FIAPF) akkredıttegen Ortalyq Azııadaǵy birden-bir kınofestıval.
Festıvaldiń turaqty quryltaıshysy ári uıymdastyrýshysy - QR Mádenıet jáne aqparat mınıstrligi.
Kınofestıvaldi uıymdastyrý jumysy Sháken Aımanov atyndaǵy «Qazaqfılm» ulttyq kınostýdııasyna tapsyrylǵan. Aıta keteıik, bıyl kınostýdııaǵa 90 jyl, Sháken Aımanovtyń týǵanyna 110 jyl jáne «Qazaqfılm» kınostýdııasyna onyń esimi berilgenine 40 jyl tolyp otyr.
«Eýrazııa» kınofestıvali jyl saıynǵy dástúr boıynsha álemdik jáne otandyq kınonyń ózekti trendterin kórsetetin jarqyn ári mańyzdy týyndylardy jınaıdy.
Búginde «Eýrazııa» kınofestıvali Ortalyq Azııa óńirindegi eń mańyzdy mádenı is-sharalardyń birine aınalǵan. 1998 jyly festıval qurylǵan sátten bastap otandyq kınematografısterdiń tutas býyny qalyptasqan. Olardy «Eýrazııa urpaǵy» dep ataýǵa bolady.
Uıymdastyrýshylardyń aıtýynsha, bıyl kınofestıval aıasynda Halyqaralyq baıqaý ótedi, oǵan Eýropa men Azııa elderiniń tolyqmetrajdy fılmderi, sondaı-aq Ortalyq Azııa men Túrki álemi elderiniń fılmderi usynylady.
Kınofestıvaldiń saltanatty ashylý rásimi 24 qarashada Almaty Theatre-de ótedi.
