«80 jyl buryn sol kezdegi basshylar eń qıyn kezeńde, álemdik soǵystyń tórtinshi jylynda ýnıversıtet ashý týraly úlken sheshim qabyldady. Ejelgi Grekııada bir jaqsy naqyl sóz bar. «Qoǵam qashan úlken bolady? Sol qoǵamdaǵy adamdardyń úlkenderi kóleńkesine otyra almaıtynyn bile tura aǵash ekken». 1944 jyly úlken aǵash egilse, sol aǵashtyń kóleńkesinde qazir biz otyrmyz. Birinshiden, ustazdarǵa, professorlyq-oqytýshylyq quramǵa, ýnıversıtet basshylyǵyna aıtarym, aǵashtardy ege berińizder, shamshyǵarymyz sónbesin. Qyzdar ýnıversıteti – tek bilim berý ordasy emes, ulttyq qunylyqtardy dáripteýshi jáne tikeleı qoǵamǵa jetkizýshi bilim ordasy», dedi mınıstr.
Saltanatty is-sharaǵa ýnıversıtettiń dırektorlar keńesiniń tóraǵasy Omarhan О́ksikbaev, Prezıdent janyndaǵy Ulttyq Ǵylym akademııasynyń Prezıdenti Aqylbek Kúrishbaev,Ulttyq ınjenerlik akademııa Prezıdenti Baqytjan Jumaǵulov, Parlament Májilisi depýtaty, Prezıdent janyndaǵy Áıelder isteri jáne demografııalyq saıasat jónindegi Ulttyq komıssııa múshesi Qaraqat Ábden Jaqsylyqqyzy, Qazaqstannyń tuńǵysh Eńbek Eri Aıagúl Mırazova, «Turan» ýnıversıtetiniń rektory, akademık Rahman Alshanov, Prezıdent janyndaǵy Ulttyq ǵylym akademııasy Dırektorlar keńesiniń táýelsiz dırektory, Ulttyq quryltaı múshesi, akademık Kárimbek Qurmanálıev, Parlament Májilisiniń depýtaty Irına Smırnova qatysyp, quttyqtaý sóz sóıledi.
Qazaq ulttyq qyzdar pedagogıkalyq ýnıversıtetiniń basqarma tóraǵasy-rektor Qanaı Gúlmıra Ámirhanqyzy Dırektorlar keńesiniń tóraǵasyna alǵysyn bildirip, ýnıversıtettiń damýyna qosqan úlesi úshin medal tabys etti.
«Mereıtoı aıasynda bir jyl boıy kóptegen konferensııalar, ǵylymı jobalar júzege asyryldy, ortalyqtar ashyldy, professorlar dáris oqydy. Biraq búgingi kún erekshe, sebebi ýnıversıtetimizdiń basty jetistigi, qoǵamǵa bergen jaqsylyǵy sizderdiń aldaryńyzda otyr. Ýnıversıtetimizdiń órkendep, ósýine úles qosyp júrgen el aǵalaryna alǵys aıtamyn. Omarhan Nurtaıuly ýnıversıtetimizge kólemdi ınvestısııa alyp keldi. Qyzdardyń bilim alýyna qoldaý bildirip, memleket tarapynan Almatynyń ortalyǵynan ǵımarat berilýine, zerthanalardyń ashylýyna septigin tıgizdi», dedi rektor.
Is-shara barysynda Aıagúl Mırazova ujymdy quttyqtap, sáttilik tiledi.
«Qazaq ulttyq qyzdar pedagogıkalyq ýnıversıtetiniń 80 jyldyǵy – barsha Qazaqstannyń qýanyshy desem, artyq aıtqanym emes. Ozyq oıly ultty tárbıeleýde ana men ustazdyń alar oryny erekshe. Al Qazaq ulttyq qyzdar pedagogıkalyq ýnıversıteti osy jolda aıanbaı eńbek etýde. Nebir tulǵalar osy ýnıversıtetten túlep ushty. Tarıhy óte tereń ýnıversıtetimiz órkendeı bersin. Bilikti ustazdarymyz, eldi álemge tanytatyn túlekterimiz kóp bolǵaı», dedi Aıagúl Tóreqyzy.
Parlament Májilisi depýtaty Irına Smırnova qoǵamda qyz bala tárbıesiniń mańyzdylyǵyna toqtalyp, «Tárbıeli, izgi qasıetterge ıe qyzdar bolashaqta ulttyń ar-namysyn saqtaıtyn, qoǵamǵa úlgi bolatyn urpaqty tárbıeleýde mańyzdy rólge ıe», dep atap ótti.
Ýnıversıtet túlegi, aqyn Memlekettik syılyqtyń ıegeri Aqushtap Baqtygereeva, memleket jáne qoǵam qaıratkeri, «Parasat» ordeniniń ıegeri Orazkúl Asanǵazy, qoǵam qaıratkeri, fılologııa ǵylymdarynyń kandıdaty, professor, «Parasat» jáne 2 dárejeli «Dostyq» ordenderiniń ıegeri Asyly Osman quttyqtaý sóz sóılep, bolashaq mamandarǵa sáttilik tiledi.
Forýmda ýnıversıtet rektory Gúlmıra Qanaı bilim jáne ǵylym, mádenıet salalaryn damytýǵa úles qosqan túlekterge alǵys aıtyp, mereıtoılyq tósbelgi tabystady.
Saltanatty keshte qonaqtar konserttik baǵdarlama tamashalap, ýnıversıtet túlegi, Qazaqstannyń eńbek sińirgen ustazy Orynsha Qarabalına 1 kýrs stýdentine Stýdenttik bılet tabystady.
ALMATY
