Foto: altainews.kz
«Qalamyzdyń órkendeýiniń negizi – turaqtylyq, qoǵamdyq kelisim, beıbitshilik jáne tártip. Biz qıyn sátterdi birge eńserip, olardyń sheshimin tabýda birlesip áreket ettik. Memleket basshysynyń qoldaýyn únemi sezip kelemiz. Rıdder jylý elektr ortalyǵyn qaıta qalypqa keltirý úshin atqarylǵan jumystardyń aýqymyn kórip otyrmyz. Qalpyna keltirý jumystaryna 16 mıllıard teńgeden astam qarajat bólindi. 20 shaqyrymnan astam jylý jelileri jóndeldi», delingen úndeýde.
Rıdder turǵyndary kópsalaly aýrýhana kesheniniń qurylysyn aıaqtaýǵa 28 mıllıard teńge bólý týraly búgingi sheshimdi erekshe yqylaspen qabyldady.
Sonymen qatar, úndeýde elimizde biryńǵaı ýaqyt beldeýin engizý máselesi de qozǵaldy.
«Shyǵys jurty árqashan memleket bastamalaryn alǵashqylardyń biri bolyp qoldaıdy. Bul joly da dál solaı. Jańa ýaqyt beldeýine kóshý – elimizdiń tıimdi jumys isteý múddesine saı Úkimet qabyldaǵan strategııalyq sheshimi. Biz bul máseleniń qoǵamda alaýyzdyq týdyrýyna jol bermeımiz jáne barlyq qazaqstandyqtardy bul ózgeristerge túsinistikpen ári optımıstik kózqaraspen qaraýǵa shaqyramyz», deıdi rıdderlikter.
Úndeýdiń sońynda Rıdder qalasynyń Qoǵamdyq keńesi men qalalyq máslıhat depýtattary mańyzdy áleýmettik jáne ekonomıkalyq máselelerdi sheshý úshin barlyq Qazaqstan halqyn jumyla qımyldaýǵa shaqyrdy.
