Sýret: orer.eu
Bapkerlik quram Taıland tórinde kimderdiń jekpe-jekke túsetinin aıqyndady. Eldos Saıdalın 12 salmaq dárejesinde dodaǵa qosylatyn úzdikterdi qyrkúıek aıynda Qaraǵandy qalasynda ótken «Myqtylar týrnırinde» iriktegenin aıtty.
«Komandany jasaqtaǵanda tek úsh salmaqta qaı boksshylardy aparamyz degen suraq týdy. Sodan keıin oqý-jattyǵý jıyny kezinde sparrıngtik jekpe-jekterdi de uıymdastyryp, barlyǵyn jarııa túrde, ádiletti sheshtik. 48 kg salmaqta Áıgerim Sáttibaevaǵa senim artamyz. 50 kg salmaqta Alýa Balqybekova barady. 52 kg salmaqta Jazıra Oraqbaeva kúshin synaıdy. 54 kg salmaq dárejesinde Ánel Saqysh, Symbat Álıasqar, Elına Bazarova ózara tartysqa túsip, Symbat basym bolyp, Azııa chempıonatyna qatysýǵa múmkindik aldy. 57 kg salmaqta Uljan Sársenbek, 60 kg-da Vıktorııa Grafeeva, 63 kg-da Aıda Ábikeeva, 66 kg salmaqta Mılana Safronovaǵa senim artamyz. 70 kg salmaq dárejesinde tańdaý kimge túsetini ońaı bolǵan joq. Natalıa Bogdanova Gaýhar Shaıbekova men Madına Nurshaevany jeńip, myqtylyǵyn dáleldedi. 75 kg salmaq dárejesinde de solaı boldy. Dıana Maǵaýııaeva Aıda Sarybarovadan basym túsip, Azııa chempıonatyna qatysatyn boldy. 81 kg salmaqta Gúlsaıa Erjan, +81 kg salmaqta Eldana Tálipovaǵa senim artamyz. Oqý-jattyǵý jıyny josparǵa saı ótti, ázirlik jaqsy. El senimin aqtap, júlde oljalaýǵa kúsh salamyz», dedi bas bapker.
Eldos Saıdalın áıelder quramasynyń bas bapkeri laýazymyna bıyl sáýir aıynda taǵaıyndaldy. Eńbek jolyn Qaraǵandy oblysyndaǵy balalar men jasóspirimderdiń mamandandyrylǵan sport mektebinde jattyqtyrýshy bolyp bastap, jasóspirimder men jastar quramalarynyń aǵa bapkeri laýazymyn da atqardy. Aǵa bapkerlik qyzmetin atqarǵan kezeńde qyzdar 2021 jyly jastar arasynda ótken álem chempıonatynan 2 kúmis, 3 qola medal ıelendi. 2022 jyly 2 altyn, 2 kúmis, 3 qola medalǵa qol jetkizdi.
Byltyr jasóspirimder men jastar arasynda Azııa chempıonaty Astanada ótti. Onda Saıdalın baptaǵan jasóspirimder men jastar quramasy 8 altyn, 4 kúmis, 9 qola oljalady. Sonymen qatar byltyr Armenııada jasóspirimder arasynda álem chempıonaty ótip, 3 altyn, 5 qola medal buıyrdy. Eresekter quramasynyń tizginin ustaǵaly Nazym Qyzaıbaı Parıj jazǵy Olımpıadasynda qola medal enshiledi.
Bas bapkerdiń biliktiligi synalatyn saıys osy bolmaq. Eki jyl buryn Iordanııada ótken Azııa chempıonatynda qyzdarymyz 2 altyn, 1 kúmis, 5 qola medal oljalaǵan edi. Alýa Balqybekova (48 kg), Jaına Shekerbekova (54 kg), Karına Ibragımova (57 kg) qurlyq úzdigi atansa, Gúlsaıa Erjan (81 kg) fınaldyq saıysta úndistandyq Savıtaǵa ese jiberip, kúmisti mise tutty. Azııa chempıonatynyń qola medalin Nazym Qyzaıbaı (50 kg), Jazıra Oraqbaeva (52 kg), Madına Nurshaeva (66 kg), Darıǵa Shákimova (70 kg), Lázzat Kúngeıbaeva (+81 kg) enshiledi.
Bıylǵy Parıj jazǵy Olımpııa oıyndarynda Azııa qurlyǵynyń boksshylary tegeýrindi ekenin taǵy da pash etti. Máselen, 50 kg salmaqta qytaı qyzy Iý Vý chempıon atandy, qos qola medaldyń birin jerlesimiz Nazym Qyzaıbaı, ekinshisin Fılıppın eliniń boksshysy Aıra Vılegas oljalady. 54 kg salmaqta da Qytaı boksshysy chempıon atandy, Ońtústik hám Soltústik Koreıa elderiniń burymdy sportshylaryna qola medal buıyrdy. 57 kg salmaqta Taıvan boksshysy top jardy. Jalpy, áıelder boksynda Qytaı eliniń qyzdary jarap tur. Bul eldiń boksshy qyzdary Parıj jazǵy Olımpıadasyna aparǵan 5 boksshysy da fınalǵa jetip, 3 altyn, 2 kúmis medal aldy. Osyǵan qarap-aq Taıland tórindegi qurlyq dodasy bási joǵary bolatynyn baǵamdaı berińiz.
