Sýret: ru.freepik.com
- Aralas jekpe-jek álemindegi eń beldi uıym – UFC aldaǵy kúnderi taǵy bir qazaqtyń qaısar ulymen tolyǵýy múmkin. Ol úshin Baǵlan Jeńisulyna (18-5) 23 qarashada Makaoda uıymdastyrylatyn Road to UFC týrnırinde Sý Ion Iýgeni (13-3) san soqtyrýy qajet. Qytaıda týyp-ósken qandasymyz atalǵan jarystyń bastapqy básekelerinde qytaılyq Lı Iýnfendi (11-5) ekinshi raýndta esinen tandyrsa, japonııalyq Tokıtako Nakanısıdi (12-4) upaı sanymen jeńdi.
- Búgin Kanadanyń Vankýver qalasynda semserlesýden Álem kýboginiń kezekti kezeńi bastaldy. Týrnırge elimizdiń erler quramasy da qatysady. Olar – Rýslan Qurbanov, Elmır Álimjanov, Vadım Sharlaımov, Erlik Sertaı, Kırıll Pavlov. Halyqaralyq semserlesý federasııasynyń málimetinshe, Úıeńki japyraqtary elinde barlyǵy 25 komanda baq synaıdy.
- Fýtboldan 2026 jyly ótetin álem chempıonatynyń irikteý týrnırine qatysatyn komandalar bes sebetke bólindi. Qazaqstan quramasy Bolgarııa, Lıýksembýrg, Armenııa, Kosovo, Ázerbaıjan, Estonııa, Kıpr, Lıtva, Farer araldary, Latvııa quramalarymen birge tórtinshi sebetke tústi. О́zge sebettegi komandalar mynalar: birinshi – Fransııa, Ispanııa, Anglııa, Portýgalııa, Belgııa, Nıderland, Italııa, Germanııa, Horvatııa, Shveısarııa, Danııa, Aýstrııa. Ekinshi – Serbııa, Ýkraına, Túrkııa, Shvesııa, Ýels, Polsha, Majarstan, Grekııa, Norvegııa, Rýmynııa, Slovakııa, Chehııa. Úshinshi – Shotlandııa, Slovenııa, Irlandııa, Fınlıandııa, Grýzııa, Albanııa, Soltústik Makedonııa, Islandııa, Soltústik Irlandııa, Bosnııa men Gersegovına, Chernogorııa, Izraıl. Besinshi – Moldova, Malta, Andorra, Gıbraltar, Lıhtenshteın, San-Marıno. Jerebe tartylatyn kún 13 jeltoqsanǵa belgilenip otyr.
- Nysana kózdeýden el quramasynyń sportshysy Nıkıta Chırıýkın Azııanyń jańartylǵan ASC reıtınginde birinshi oryndy oljalady. Ol 25 metrden jyldam atylatyn tapanshamen oq atýdan 1500 upaı jınady. 50 metrden kishi kalıbrli myltyqpen úsh qalyptan oq atý boıynsha Konstantın Malınovskıı besinshi orynda. Dál osy dıssıplınada Aleksandra Le jetinshi oryndy ıelense, pnevmatıkalyq tapanshamen 10 metrden oq atýda Valerıı Raqymjanov besinshi satyǵa jaıǵasty.
- Halyqaralyq ústel tennısi federasııasy óz reıtıngin jańartty. Sońǵy birneshe WTT týrnırlerindegi tabysynan keıin Jánııa Bekmuhambetova birden birneshe satyǵa joǵarylap, qazirgi kezde 11 jasqa deıingi oıynshylar arasynda ekinshi orynǵa ornyqty. Qazaq qyzy tek japonııalyq Mıký Matsýshımadan ǵana qalyp keledi. Al úzdik úshtikti amerıkalyq Izabela Djoseff túıindeıdi.
- Qurlyqtyq hokkeı lıgasynda (QHL) kúsh synasyp júrgen «Barys» oıda joqta úzdikter sanatynda júrgen Magnıtogorskiniń «Metallýrg» klýbyn utyp, aıdy aspanǵa bir-aq shyǵardy. Astanada ótken oıyn bastalǵan bette Maksım Mýhametov esep ashsa, qonaqtar lezde tarazy basyn teńestirdi. Desek te 29 mınýtta Kırıll Panıýkov soqqan gol aıdyn ıelerine jeńis syılady. Esep – 2:1.
