Foto: Vedomstvo
Bilim berý salasyndaǵy sapany qamtamasyz etý komıteti men onyń aýmaqtyq departamentteri 2024 jyldyń basynan beri júrgizgen monıtorıng barysynda 58 mekteptiń bilim berý qyzmetin lısenzııasyz júrgizgenin anyqtaǵan, búginde olardyń 17-si qoıylatyn talaptarǵa sáıkestendirildi. QR ÁQBtK 463-baby boıynsha aıyppul salý týraly sot qaýlylary shyqqan. Atalǵan mektepter – Astana, Almaty qalalarynda jáne Atyraý, Almaty, Batys Qazaqstan, Túrkistan, Mańǵystaý, Jambyl oblystarynda ornalasqan.
«QR «Bilim týraly» Zańyna sáıkes barlyq mektep bilim berý qyzmetin bastamas buryn ruqsat alýy tıis. Lısenzııanyń bolmaýy mektepterdiń talaptarǵa sáıkestigi boıynsha tekserýden ótpegenin nemese ruqsat alý úshin qujattardy tapsyrmaǵanyn bildiredi. Bilim berý uıymdary bilim berý qyzmetimen aınalysýǵa lısenzııa alǵan sátten bastap qana quqyly. Eger mektep memlekettik tirkeýden ótken sátten bastap alty aı ishinde lısenzııa almasa, onda ol sot tártibimen jabylýǵa tıis», dep atap ótti komıtet tóraǵasy Ernur Dáýenov.
Vedomstvonyń baspasóz qyzmeti naqtylaǵandaı, lısenzııa alýǵa qoıylatyn negizgi talaptar tıisti materıaldyq-tehnıkalyq bazanyń, bilikti pedagogıkalyq quramnyń bolýyn, sanıtarlyq-epıdemıologııalyq jáne órtke qarsy normalardyń saqtalýyn, sondaı-aq bilim alýshylarǵa medısınalyq qyzmet kórsetýdi uıymdastyrýdy qamtıdy. Atalǵan talaptarǵa sáıkes kelmeý ákimshilik jaza qoldaný men qaıtalama buzýshylyqtar bolǵan jaǵdaıda bilim berý mekemesiniń qyzmetin toqtatý úshin negiz bolyp sanalady.
Esterińizge salaıyq, mektepter baǵynystylyǵy boıynsha jergilikti atqarýshy organdardyń qaramaǵyna jatady. О́z kezeginde aýmaqtyq departamentter óńirlik ákimdikter men bilim basqarmalarynyń basshylaryna buzýshylyqtardy joıý jóninde sharalar qabyldaý týraly resmı hat joldady.
