10 jasqa deıingi oıynshylar arasynda Alanna Berikqyzy asqan sheberligimen tánti etti. 100 úmitkerdiń arasynan sýyrylyp shyqqan qazaq qyzy altynnan alqa taqty. Jarys barysynda ol 11 týrdan keıin 9,5 upaı jınady. Sóıtip, Alanna óziniń basty qarsylastary – amerıkalyq Eımı Iаng (9 upaı) pen mońǵolııalyq Ider Selmýýndi (8,5 upaı) artqa tastady. Byltyr ol 9 jasqa deıingi shahmatshylardyń saıysynda top jarǵan edi. Mine, endi Berikqyzy eki dúrkin álem chempıony atanyp otyr.
12 jasqa deıingi uldar arasynda Mark Smırnovqa teń keler eshkim tabylmady. 11 týrdan keıin 10 upaıdy qorjynǵa salǵan otandasymyz bas júldeni qanjyǵasyna baılady. Bul sanattaǵy 150 oıynshynyń arasynan polshalyq Antonıı Radzımskıı men fransııalyq Davıd Lasan Rýs ekinshi, úshinshi oryndardy ózara bólisti. Ekeýi de 8,5 upaıdan jıdy. Dál osy jastaǵy qyzdar arasynda Hanzada Amanjol qytaılyq Sıýe Tıanhaomen birdeı nátıje kórsetti. Ekeýinde de – 9 upaı. Biraq qosymsha kórsetkishter boıynsha Sıýeniń baǵy janyp, bizdiń Hanzada kúmis medaldy qanaǵat tutty. Qola júldeni vetnamdyq Tong Thaı Hoang An (9 upaı) ıelendi.
Italııada ótken jarysta barlyǵy 77 memleketten kelgen 710 shahmatshy baq synady. Solardyń arasynan elimizdiń quramasy (2 altyn, 1 kúmis) barlyǵynan ozyp, jalpykomandalyq esepte birinshi oryndy oljalady. Qytaı (2 altyn, 1 qola) ekinshi oryn alsa, Úndistan (1 altyn, 1 qola) úshinshi satyǵa jaıǵasty.
