UMC Júrek ortalyǵynyń pasıenti Indıra Smaǵulova óziniń tolyqqandy, salamatty ómir súrý múmkindigin uzaq kútti. 2022 jylǵy 13 qańtarda tańerteń klınıka dárigeri donordan júrek transplantasııasynyń múmkindigi týraly habarlady. Indıraǵa 2012 jyly keńeıtilgen kardıomıopatııa dıagnozy qoıyldy. Bul aýrýda júrek qýystary men ólshemderi ulǵaıady, ol óz kezeginde júrek jetkiliksizdiginiń damýyna, aǵzanyń qandy tıimdi aıdaı almaýyna ákeledi.
2018 jyly UMC basqarma tóraǵasy, kardıohırýrg Iýrıı Pıa bastaǵan klınıka toby pasıentke «Jarvik» mehanıkalyq sorǵysyn sátti ımplantasııalady. Bul tolyq ımplantasııalanatyn júrekti qoldaý júıesi pasıentterdiń ómir súrý sapasyn uzartý, jaqsartý maqsatynda jasalady, kóbinese «transplantasııaǵa kópir» bolyp tabylady. «Jarvik» tehnologııasy LVAD qurylǵylarynyń ekinshi býyny bolyp, uzaqmerzimdi paıdalanýda joǵary sapa kórsetti. Qurylǵyny ımplantasııalaý pasıenttiń jaǵdaıyn jaqsartýǵa kómektesti, kelesi birneshe jyl ishinde Indıra ózin jaıly sezindi, júrek transplantasııasyn kútý tiziminde boldy.
«Densaýlyq jaǵdaıyna baılanysty Astanaǵa kóship keldim, donorlyq júrekti kútip, mehanıkalyq qurylǵymen 4 jyl júrdim. Klınıkadan qońyraý túsken kezde jańa ómirge múmkindik bar ekenin birden bildim. Klınıka toby operasııany sátti júrgizip, qalpyna keltirýge kómektesti. UMC Júrek ortalyǵynyń ujymyna, barlyq dárigerlerge alǵysymdy bildiremin», deıdi pasıent.
Qazirgi ýaqytta pasıenttiń jaǵdaıy jaqsy, ol josparly tekserýlerge qatysyp, qajetti dári-dármekterdi qabyldaýdy jalǵastyryp jatyr. Turaqty jumysy bar Indıra kún saıyn donor men onyń týystaryna ómir súrýge múmkindik bergenine alǵys bildirip otyrady.
Osy ýaqytqa deıin UMC Júrek ortalyǵynyń komandasy 98 júrek transplantasııasyn jasady. Onyń ishinde eki operasııa klınıka mamandarynyń qatysýymen alǵash ret Shymkent qalasynda, bir operasııa Almaty qalasynda júrgizildi. Statıstıkaǵa sáıkes, elde organ transplantasııasyn kútý tiziminde 4 000 pasıent bar, onyń 140-y júrek transplantasııasyn qajet etedi.
