Sýret: 7-su.kz
Qazirgi kúni álemdik geosaıası ahýal – alańdatarlyq jaǵdaıda. Jan-jaǵymyzda túrli qaqtyǵys bolyp jatyr. Saıası turaqsyzdyq, transulttyq qylmystar, terrorıstik qaýip-qater, esirtki aınalymy sekildi kez kelgen memlekettiń shańyraǵyn shaıqaltýy múmkin keleńsizdik kóp. Mundaı kezde jalǵyz jortqannyń shańy shyqpaıtyny belgili. Sondyqtan kórshiles, taǵdyrlas, tarıhı tamyrlas elder tize qosyp, áreket qylsa, alynbaıtyn qamal joq.
Qazaq eli óz táýelsizdigi men egemendigin saqtaý jolynda «Alystaǵy aǵaıynnan janyńdaǵy kórshiń artyq» degen ata-baba ósıetin berik ustanyp, UQShU, TMD, ShYU sekildi halyqaralyq uıymdarǵa belsendi qatysyp keledi. UQShU Ujymdyq qaýipsizdik keńesiniń tóraǵasy retinde Prezıdent Qasym-Jomart Toqaev ta aınalamyzda bolyp jatqan ahýaldy jiti qadaǵalap, qaýipsizdik máselesin únemi kóterip, kózden tasa qylmaı júr. Búgingi elordamyzda ótken basqosý da el irgesin bekitýge baǵyttalǵan úlken qadam boldy.
Taǵy bir aıta keter jaıt, Qazaq eli álemdegi orta derjavalardyń qataryna endi. Qazirgi tańda halyqaralyq jaǵdaıda kóp máseleni orta derjavalar sheship jatyr. Biz de búginde alpaýyt memleketter men shaǵyn elder arasynda altyn kópir bolyp, qaýipsizdik sharttarynyń qabyldanýyna septigimizdi tıgizip kelemiz.
Bıyl elimizdiń uıymǵa tóraǵalyq etýi kezinde uıymnyń jarǵylyq organdarynyń otyrystary, áskerı oqý-jattyǵý jıyndary jáne aldyn alý operasııalary josparly túrde uıymdastyrylyp, qaýipsizdik keńesi hatshylary men parlament spıkerleriniń deńgeıinde kezdesýler ótti. Uıymnyń qosymsha jáne jumys organdarynyń keńesteri ótkizildi. Birqatar mańyzdy qujat qabyldandy. Olar halyqaralyq yntymaqtastyq, qorǵanys salasyndaǵy yqpaldastyq, sondaı-aq ujymdyq qaýipsizdiktiń ózekti syn-qaterleri men qaýipterine qarsy is-qımyl máselelerin qamtydy.
Biz Astanada ótken jıyn arqyly kez kelgen qaýip-qaterge tize qosyp qarsy tura alatynymyzdy taǵy bir dáleldedik. Jıyn qorytyndysy boıynsha memleket basshylary Ujymdyq qaýipsizdik keńesiniń deklarasııasyn qabyldap, birqatar qujatqa qol qoıǵany belgili. Atap aıtqanda, Tájik-aýǵan shekarasyn nyǵaıtý jónindegi UQShU-nyń maqsatty memleketaralyq baǵdarlamasy, Ekinshi dúnıejúzilik soǵystaǵy Jeńistiń 80 jyldyǵyna baılanysty málimdeme qabyldandy. Kelesi jyly osy aıtýly dataǵa oraı uıymdastyrylatyn merekelik is-sharalardyń jospary bekitildi.
Qabyldanǵan qujattar uıym men ujymdyq qaýipsizdik júıesin barlyq múshe memleketterdiń múddesine saı keshendi túrde damytýǵa baǵyttalǵan. Taǵy qaıtalap aıtsam, sonyń ishinde elimizdiń táýelsizdigin nyǵaıtýǵa baǵyttalyp otyr. El basyna kún týsa, janyńnan tabylar jaqtastaryń bolǵany jón ekenin ýaqyttyń ózi dáleldep turǵany – aqıqat.
Ǵalıasqar SARYBAEV,
Senat depýtaty
