Prezıdent is basqarmasyna qarasty Prezıdenttik ortalyqta ashylǵan kórmeniń maqsaty – tarıhı tulǵalardyń rýhanı murasyn keńinen nasıhattaý. Ol úshin Ulttyq arhıvten, Sáken Seıfýllın mýzeıinen, Jetisý oblysynyń Muhamedjan Tynyshbaev atyndaǵy tarıhı-ólketaný mýzeıinen, Turar Rysqulov atyndaǵy Túlkibas aýdandyq tarıhı-ólketaný mýzeıinen, Jambyl oblystyq tarıhı-ólketaný mýzeıleriniń qorlarynan fotosýretter men qujattar alynǵan.
– Bul – bolashaq urpaq úshin óte mańyzdy. RKFSR Halyq Komıssarlary keńesi tóraǵasynyń orynbasary bolyp 11 jyl qyzmet istegen, Turar Rysqulovtyń eńbegi ushan-teńiz. XX ǵasyrdyń 30-jyldary Búkilodaqtyq kommýnıstik partııanyń ortalyq komıtetine buryn-sońdy bolmaǵan ashtyqqa ushyraǵan qazaq halqynyń taǵdyry týraly úndeýlerdiń esebinen Qazaqstanǵa azyq-túlik kómegin kórsetý máselesi sheshilgenin erekshe atap ótý kerek, – dedi T.Rysqulovtyń nemeresi Adel Rysqulova.
Uıymdastyrý aıasynda júrgizilgen izdestirý-jınaqtaý jumystarynyń nátıjesinde alynǵan M.Shoqaıdyń 1920–1930 jyldary qoldanǵan jazý máshińkesi, «Iаsh Túrkistan» jýrnalyn shyǵarý barysynda paıdalanǵan mórleri, Turar Rysqulovtyń redaksııasymen jaryq kórgen «Vosstanıe 1916 goda v Kırgızstane» kitaby, «ALJIR» tutqyny Ázıza Rysqulovanyń sandyǵy, «Hashııa Radııa Muhtar» kitaby, sııa saýyt, kúrsi syndy túpnusqa jádigerler kórermenderdiń erekshe qyzyǵýshylyǵyn týdyrdy.
– 1991 jyly qol jetkizgen táýelsizdik – elimizdiń óz bostandyǵy, ar-namysy, abyroıy, birligi men týǵan jeriniń tutastyǵy úshin san ǵasyrlyq kúresiniń qısyndy nátıjesi. Bıyl mereıtoılaryn atap ótetin qazaq halqynyń birtýar perzentteri – M.Tynyshbaev, M.Shoqaı, S.Seıfýllın, T.Rysqulovtyń qyzmeti de osy shejireniń dańqty paraǵyna aınaldy. Halqymyzdyń egemendikke jetý jolyndaǵy basty belesterdi eske sala otyryp, memlekettigimizdiń qalyptasýy men damýynda eleýli ról atqarǵan Alash jáne Túrkistan avtonomııalaryn eske alý, keıingi urpaqqa nasıhattaý búgingi bizdiń paryzymyz, – dedi Prezıdenttik ortalyq dırektory Baqytjan Temirbolat.
Aıta keteıik Prezıdenttik ortalyqtyń kitaphana jáne mýzeı qorlarynan eksponattar men kitaptar, memleket qaıratkerleri týraly tarıhı qujattar qoıyldy. Barlyǵy 170-ke jýyq materıal ornalastyryldy.
