Qalamgerdiń bolmysy áspetteldi

Iá, Jumabek Omarulynyń bolmysy, atqarǵan ónegeli isteri qaı dárejede de, qaı deńgeıde de áspetteýge laıyq. О́ıtkeni tuǵyrly tulǵanyń ómir joly týǵan halqynyń, eliniń, Otanynyń qadirin bıiktetýge, ózi ǵumyr keshken qoǵamynyń kem-ketigin túzeý­ge, ózekti túıtkilderin baspasóz arqyly tarazylaýǵa, baǵyt-baǵdar siltep, jón-joba nusqaýǵa, ýaqyt sózin aıtýǵa baǵyttaldy. Oı kózi­men qarasaq, Jumekeń otandyq jýrnalıstıkanyń kórnekti ókili retinde eren eńbegimen, qajyrly izdenisimen ult baspasóziniń tuǵy­ry­ berik, týy bıik bolýyna adamı-aza­mattyq qalybymen, aqıqat­tan attamaıtyn shynshyl mine­zimen, týmysynan birge jara­tylǵan adaldyǵymen aýqymy men kólemi ólsheýge syımaıtyn jarqyn is atqaryp, eren eńbek sińirdi. Qaıratker azamattyń bútin bir ómir joly otandyq baspasózdiń aýmaly-tókpeli jyldardaǵy tynys-tirshiligine aralasýmen, óz taǵdyryna buıyrǵan jýrnalıstıkanyń bes batpandaı aýyr júgin arqalaýmen ótti. J.Omaruly jýrnalıstıkadaǵy dás­­túr sabaqtastyǵyn saqtaýǵa, óz za­manynyń jańashyl­dy­ǵy­men tolyq­tyrýǵa aq adal qyz­met etti.

III Jumabek Kenjalın oqý­la­ryn júrgizgen jýrnalıstıka fakýl­tetiniń dekany Qanat Áýesbaı Par­la­ment Senatynyń tóraǵasy Máý­len Áshimbaevtyń, ál-Farabı atyn­daǵy QazUÝ rektory Janseıit Túı­me­baevtyń quttyqtaýlaryn oqyǵan soń, baǵdarlamaǵa sáıkes sóz alǵan meımandar onyń qadir-qasıe­tin, azamattyq qyrlaryn aıtyp, jýrnalıstıka men baspasóz salasyn damytýdaǵy eseli eńbegine toqtaldy.

Tolǵaýly pikirlerin, júrek­jardy lebizderin ortaǵa salǵan­dardyń árqaısysy Jumabek Omar­uly­na degen rııasyz kóńilin, shetsiz-sheksiz qurmetin, yqylas-peıilin kesteli sózderimen, órnekti oılarymen bezbendedi.

О́z sózin asyldardy ardaqtaý dástúrin berik ustanyp otyrǵan ýnıversıtetke alǵys aıtýdan bastaǵan qoǵam qaıratkeri Saýytbek Abdrahmanov Jumabek Omarulynyń kirshiksiz taza bolmysynan, jýrnalıstik qyzmetinen tartyp, «Qazaq gazetteri» aksıo­nerlik qoǵamyn saqtap qalýdaǵy eńbegimen sabaqtaı kelip, qarymdy qalamgerdiń ár qyry birte-birte zerttelip ashyla berýge tıis ekenin aıtsa, belgili qalamger Janbolat Aýpbaev ardaqty azamatpen birge jumys istegen jar­qyn jyldardy eske alyp, ta­bandy jýrnalıst, bilimdi de bilikti basshy, ómiriniń sońǵy sátine deıin júrdek ýaqyt júrisine laıyq jumys ma­shy­ǵy­nan tanbaǵan qajyr-qaırat ıesi retindegi qasıetterine nazar aýdardy.

«Jumabek – búkil adamdyq qa­sıet-qadiri tolyq qalyptasqan, ómir­­ge adam bolyp kelip, ómirden adam bolyp ótken úlken júrekti azamat» dep sóz sabaqtaǵan fılologııa ǵylymdarynyń doktory О́mirhan Ábdı­manuly qaıratker tulǵa kóte­­rilgen bıiktiktiń bári de taza eńbegimen, ádil júrip, jaq­sylyqtyń janashyry bola bilýiniń arqasynda jetken jetis­tikter nátıjesi», dedi.

Alqaly jıynda kórnekti pýblısıst Qaınar Oljaı, Talǵat Aıt­baıuly, «Qazaq gazetteri» JShS bas dırektorynyń orynbasary – Almaty basylymdarynyń jetek­shisi Serik Ábikenuly, t.b. azamat­tar sóz sóıledi. «Atamura» korpo­ra­sııasynyń prezıden­ti Rahymǵalı Qul-Muhammed jýrnalıstıka maı­tal­manynyń 70 jyldyǵyna arnap avtordyń «Ult rýhyn ulyqtaǵan urpaqpyz» eńbe­gin 3 myń danamen shyǵarýǵa bastamashylyq jasaǵanyn aıtyp, atalǵan kitaptyń qundylyǵy jóninde oı órbitti.

III Jumabek Kenjalın oqý­lary aıasynda qos birdeı kitap­tyń, atap aıtqanda «О́negeli ómir» serııasy­men jaryq kórgen «Juma­bek Ken­jalın» dep atalatyn ǵumyr­­­na­ma­lyq jınaqtyń, sondaı-aq J.Ken­ja­­­lın­niń «Ult rýhyn ulyq­ta­­ǵan urpaq­­pyz» atty týyndysynyń tusaýy kesilip, oqyrman qaýymǵa jol tartty.

Is-shara aıaqtalǵan soń konferen­sııa qatysýshylary Panfılov kóshesinde ornalasqan 101 úıdi betke aldy. 1985–2009 jyldar aralyǵynda Jumabek Kenjalın turǵan bul kóp­qabatty eńseli úıdiń qabyrǵasyna ornatylǵan eskertkish taqtanyń ashylý rásimi jasaldy. Budan soń kósemsóz sheberiniń rýhyna arnap as berilip, quran baǵyshtaldy. Asta da talaı ıgi jaqsylar óz estelikterimen bólisti. Ardaqty tulǵanyń zaıyby Álıma Abdrahmanqyzy, qalam­gerdiń uldary Dastan men Jandos Kenjalınder qoldaý bildirip kelgen barsha janashyr azamattarǵa áýlet atynan alǵysyn jetkizdi.

Dáýirjan JUMAJANULY,

jýrnalıst