foto: adyrna.kz
Depýtat Murat Ábenov elimizde beleń alyp jatyrǵan qyz alyp qashý máselesine Mádenıet jáne aqparat mınıstrligi nazar aýdarmaı otyrǵanyn aıtty.
«Astanadaǵy ýnıversıtettiń stýdentteri maǵan alyp qashqan qyzdy májbúrlep qolhat jazdyryp jatyrǵan beınerolıkti kórsetti. Al mádenıet salasy osyndaı quqyqbuzýshylyqty nasıhattap otyr. Mysaly ánshiler «Alyp qasham meıli olaı qalama, kelin qylam seni qalaı da anama», «Kóresiń meniń úıime barasyń, basyńa appaq oramal taǵasyń! Kóndirem, kónesiń, qyz bolyp kelesiń — kelin bolyp qalasyń», dep án shyrqap júr. Menińshe, mundaı dáripteýlerge zańmen tyıym salý kerek. Men qyz alyp qashýǵa bólek normalar engizýdi usynamyn», dedi Murat Ábenov.
Depýtattar sonymen qatar Memleket basshysynyń Ulttyq quryltaıda elimizdegi qyz alyp qashýdy ulttyq dástúr sanap, el ishinde dáriptegisi keletinderdiń áreketine birjola tosqaýyl kerektigin aıtqanyn, alaıda bul tapsyrmanyń áli kúnge deıin oryndalmaǵanyn alǵa tartty.
Májilis depýtaty Edil Jańbyrshın qyzdyń taýar nemese jeke zat emes ekendigin, máseleniń ózegin tereńnen, tárbıe berýden bastaý qajet ekenin aıtty.
«Bárimiz de qyz ósirip otyrmyz. Qarakóz qyzdaryn qorǵaı almaǵan memlekettiń de bolashaǵy bolmaıdy. Sondyqtan uldarǵa kishkene kúninen bilim ordalarynda, balabaqshalarda, otbasynda qyzdy qurmetteýdi úıretýimiz kerek», dedi ol.
Eki depýtat ta máseleni kún tártibine engizip, zańnamalyq turǵyda qarastyrýdy usyndy. Májilis tóraǵasy Erlan Qoshanov bul másele aldaǵy otyrystarda bólek taqyryp retinde qarastyrylatynyn málimdedi.
