Kógildir toǵandar men Ońtústik-Shyǵys arasynda jańa jabyq stadıon, basseıni bar ámbebap sport arenasy, kópfýnksıonaldy muz kesheni salynady. Oblys ákimi Ermaǵanbet Bólekpaev turǵyndarmen kezdesýinde Qaraǵandyny damytý josparlaryna toqtaldy.
«Memleket basshysy Qasym-Jomart Toqaev buqaralyq sportty damytýǵa úlken kóńil bólip otyr. Bizdiń aldymyzda salaýatty urpaq tárbıeleýmen qatar, otandyq sportshylardy daıyndaý boıynsha da naqty mindetter tur. Kók toǵandar men Ońtústik-Shyǵys arasynda sport klasterin salýǵa 72 gektar jer bóldik. Biz jabyq stadıon, hokkeı, konkı tebý, mánerlep syrǵanaý jáne basqa da sport túrlerine arnalǵan kópfýnksıonaldy muz keshenin salamyz», dedi Ermaǵanbet Bólekpaev.
Sonymen qatar aýmaqta jeńil atletıka manejin, basseıni bar ámbebap sport arenasyn, kúres jáne boks zaldaryn salamyz. Barlyq nysandar halyqaralyq standarttarǵa saı bolady, bul tıisti synyptaǵy jarystardy ótkizýge múmkindik beredi.
Qurylys kelesi jyly bastalady. Bul aýdannyń damýyna oń áserin tıgizip, sportshylardy yntalandyrady.
Sondaı-aq, aımaq basshysy kelesi jyldy Maıqudyq pen Ońtústik-Shyǵysty damytý jyly dep jarııalady.
