Sýrette: merekeden kórinister
Almaty oblysynyń ákimi Marat Sultanǵazıev saltanaty sharada óńirdiń agroónerkásip kesheniniń jetistikterin atap ótip, aýyl sharýashylyǵynyń eldiń azyq-túlik qaýipsizdigin qamtamasyz etýdegi rólin erekshe kórsetti. Ol aımaqtaǵy egin jáne mal sharýashylyǵy salasynda da ilgerileý bar ekenin aıtty.
Bıylǵy jyly óńirdiń aýyl sharýashylyǵy salasynda 573 mlrd teńgeniń ónimi óndirilgen. Agroónerkásiptik keshendi damytýǵa baǵyttalǵan memlekettik baǵdarlamalar aıasynda sharýalarǵa 26 mlrd teńgeden asa sýbsıdııa berilgen. Agraraly aımaq respýblıkada et óndirý boıynsha 1-orynǵa shyǵyp, óndiris kólemi 214 myń tonnaǵa jetken.
Sondaı-aq, salaǵa serpin berer tehnıkalar da jańara túsken. Osy jyldyń 10 aıynda óńirde jalpy quny 4,6 mlrd teńge bolatyn 365 dana aýyl sharýashylyǵy tehnıkasy satyp alynǵan. Sharýalar sý únemdeý ádisine de birtindep aýysyp jatqany baıandaldy. О́ńirde jańadan 8 joba iske qosylǵan.
«Sý únemdeý tehnıkalaryn paıdalanatyn alqaptardy 2 esege ulǵaıttyq. Byltyr 20 myń gektar bolsa, qazir 43 myń gektar boldy. Kórmedegi bir ǵana traktor zaýyty Kókshetaýdaǵy 90 tehnıkany osy jerde satty. Byltyrǵa qaraǵanda biz tehnıka jańartýyn 1,5-2 esege ulǵaıttyq», dedi óńir basshysy.
Mamandardyń kásibı merekesine oraı aýyl sharýashylyǵy salasyndaǵy úzdik mekemeler men sharýa qojalyqtary marapattaldy. Arasynda belsendi qyzmetkerler men uıym ókilderi de bar. Olarǵa túrli memlekettik nagradalar men qarjylaı syıaqylar tabystaldy.
Solardyń biri «Parasat» ordeniniń ıegeri Erik Aıdarbaev:
«Jaqynda Memleket basshysy Qasym-Jomart Toqaevtyń qatysýymen aýyl sharýashylyǵy eńbekkerleriniń birinshi forýmy ótken. Bul jıynda keleli áńgimeler aıtylyp, ózekti máseleler kóterildi. Búgin mine, oblystyń sharýalary bas qosyp jatyrmyz. Mundaı qoldaý bizge salany odan ary damytýǵa, óndiristi ulǵaıtýǵa septigin tıgizedi», dedi.
Saltanatty sharaǵa jınalǵandar aýyl sharýashylyǵy damymaı, ekonomıka órkendemeıtinin basa aıtty. Almaty oblysynyń bul salada áleýeti joǵary. О́ńirdiń aýylsharýashylyq mamandary qazir agroónerkásiptik keshenin ǵylymmen ushtastyra otyryp, órkendetýdi qolǵa alǵan. Sebebi óńirdiń 70 paıyz jeri osy salaǵa óte qolaıly.
Mereke barysynda marapattalǵan úzdik aýyl sharýashylyǵy taýar óndirýshileri qatarynda «Adal» AО́K JShS, «Dáýlet Beket» JShS men «Kók Teńiz» JShS-teri bar. Sonymen qatar «Oljas», «BeeQueen», «Islam» sharýa qojalyqtary da qarjylaı syıaqyny qanjyǵalady.
Al aýyl sharýashylyǵy jármeńkelerin uıymdastyrýdaǵy belsendiligi úshin Kegen, Eńbekshiqazaq, Qarasaı aýdandary aldyńǵy úshtikke ilinse, aýyldyq okrýgter arasynda Balqash aýdanynyń Quıǵan, Jambyl aýdanynyń Aıdarly jáne Talǵar aýdanynyń Panfılov aýyldyq okrýgteri úzdikter qatarynan kórinip, qarjylaı syılyqqa qol jetkizdi.
Aıtýly merekede zańdy tulǵalar da nazardan tys qalmady. Atap aıtsaq, «Vladımır» JShS-ne YTO 804-8 traktory berilse, «Agrofırma «Kerýen» JShS 900 myń teńge, al «Fırma Altaı» JShS 600 myń teńgege ıe boldy.
Almaty oblysy
