Aýqymdy is-shara aıasynda Analar keńesiniń búginge deıin atqarylǵan jumystary qorytyndylanyp, bala tárbıesi, áke men ananyń otbasyndaǵy róli jóninde oı-pikirler ortaǵa salyndy. Forýmǵa oblys ákiminiń orynbasary Aıgúl Málikova qatysyp, Analar keńesiniń qoǵamdaǵy máselelerdi sheshýge jumyla atsalysyp júrgenine toqtaldy.
– Analar keńesi qoǵamdaǵy ulttyq tárbıeni jandandyrý men ulttyq rýhty nyǵaıtý maqsatynda otbasy qundylyqtaryn, jas urpaqty tárbıeleý, quqyq buzýshylyqtyń aldyn alý, áıelderdiń quqyqtyq saýattylyǵyn arttyrý, basqa da áleýmettik mańyzy bar máselelerdi basty nazarda ustaıdy. Bul baǵytta birneshe mekememen tyǵyz qarym-qatynas ornatqan. Uıym músheleri qoǵamdaǵy ózekti máselelerge ún qosyp, ony sheshýge belsendi qatysady. Onyń ishinde quqyqtyq tárbıe berý máselesi de bar. Keıingi kezderi jastar arasynda quqyq buzýshylyq kóbeıdi, vandalızm, zorlyq-zombylyq, balalarǵa qatysty qylmystardyń artýy alańdatady. Osy máselelerdiń aldyn alyp, adal urpaq tárbıeleý jolynda birlesip eńbek etýimiz kerek, – dedi Aıgúl Qaıyrtasqyzy.
Analar keńesiniń tóraǵasy Názıpa Shanaı keńestiń búginge deıin atqarylǵan jumystaryn baıandap, qazirgi ýaqytta júzege asyp jatqan aýqymdy jobalardyń biri – «Mádenıetti ana – mádenıetti ult» jobasynyń mańyzdylyǵyn atap ótti.
– «Analar keńesi» ortalyǵynyń qurylǵanyna – 10 jyl. Búginde 14 myńnan astam ananyń basyn biriktirip otyrǵan konsýltatıvtik keńesshi organ aýyldarda da bar. 2021 jyldan beri Memleket basshysy Qasym-Jomart Toqaevtyń tapsyrmasymen «Mádenıetti ana – mádenıetti ult» jobasyn júzege asyryp kelemiz. Jobanyń maqsaty – otbasylyq qundylyqtardy, ulttyq dástúrlerdi saqtap, óskeleń urpaqty sol rýhta tárbıeleý, – dedi N.Shanaı.
Jıyn barysynda «Ana úıi» qoǵamdyq qorymen memorandýmǵa qol qoıý rásimi ótip, Analar keńesiniń birneshe múshesi men seriktesteri Alǵys hatpen marapattaldy.
PAVLODAR
