Oblys ortalyǵynyń biraz bóligin jylý, jaryqpen qamtamasyz etip turǵan №3 JEO-da kásibı ári bilikti jas mamandardyń shoǵyry ósip keledi. Osy oraıda kásiporyndaǵy tájirıbeli mamandar qataryna qosylǵan Dıdar Tóleýhanovty aıryqsha atap ótýge bolady. Jas jigit ýnıversıtetti támamdaǵan soń, birden atalǵan stansaǵa jumysqa ornalasqan. Bıyl eńbek uıymynda turaqtap qalǵanyna on eki jyl bolypty.
«Qarapaıym aýyl balasymyn, úıdegi 6 uldyń kenjesimin. Anam jeke kásippen aınalyssa, ákem uzaq jyl polısııada eńbek etip, zeınetke shyqty. Mektepte oqyp júrgen ýaqytta fızıka salasyna asa qumartqan edim. Sol sebep boldy ma eken, bilim uıasyn támamdaǵan soń, «Elektr energetıkasy» mamandyǵy boıynsha oqý grantyna ıe bolyp, joǵary oqý ornyna tústim. Otbasymyzda bul salada menen ózge eshkim jumys istemeıdi. Kelinshegim – tarıh pániniń muǵalimi», deıdi bilikti maman.
Ol munda alǵashynda elektr monteri bolyp qabyldanyp, jyldar óte ınjener laýazymyna saı ekenin eńbegimen dáleldedi. Qazirgi laýazymy – elektr sehynda joǵary voltti synaqtar júrgizý jáne ólsheý jónindegi ınjener. Mindeti – kúrdeli jáne aǵymdaǵy jóndeýden ótken kez kelgen óndiristik jabdyqty iske qospas buryn synaqtan ótkizý. Bul jabdyqtardyń qataryna transformatorlar, generatorlar, 6 kvt kabeldik jeliler enedi. Sonymen qatar metall baılanystaryn, ózge de jabdyqtardy tekseredi.
«Eńbekte barlyǵy tájirıbemen keletinin jyldar óte túsindim. Qazir úsh adamnan turatyn brıgada basshysymyn. Mańyzdy jabdyqtardy aldyn ala tekseremiz. Eger jumysy kóńilimizden shyqpasa, aqaýdy izdeımiz. Ony tapqan soń, iske jóndeý brıgadasy qosylady. Bıyl stansadaǵy úsh birdeı qazandyqty synaqtan ótkizdik. Tútinsorǵysh, elektr jelilerin aıyrǵysh, kabeldik jeliler, kómir ýatqysh jabdyqty tekserip shyqtyq. Basshylar maǵan tájirıbeli maman retinde senedi. Árıne, qıyn kezeńder boldy, biraq tabandylyq pen kásibime berilgenimniń arqasynda barlyǵyn eńsere bildim. Búginde 6-razrıadty mamanmyn. Keıingi jyldary bul saladaǵy tarıfterdiń óskeniniń nátıjesin áleýmettik turǵydan sezinip otyrmyz. Eń áýeli biz sııaqty qarapaıym qyzmetkerlerdiń jalaqysy ulǵaıdy. Qazir óz zamandastarymdy bul qyzmetke uıalmaı shaqyra alamyn. Sebebi burynǵydaı emes, eńbekaqymyz laıyqty, otbasyn asyraýymyzǵa jetedi», deıdi ol.
Jas maman Memleket basshysy Qasym-Jomart Toqaevtyń aldaǵy jyldy «Jumysshy mamandyqtar» jyly dep jarııalaǵany qýantyp otyrǵanyn jetkizdi. Onyń nátıjesinde energetıka salasyndaǵy kadr tapshylyǵy, eńbekaqy máselesi sheshilip, mańyzdy ózgerister bolady dep úmittenedi.
Pavlodar oblysy
