Foto: Astana qalasy ákimdigi
Jańa týrıstik poıyz - Astana, Aqmola oblysy ákimdikteriniń jáne «Jolaýshylar tasymaly» AQ birlesken jobasy.
Poıyz vagondary elimizdegi ZIKSTO zaýytynda shyǵarylǵan. Vagondardyń ishinde zamanaýı kondısıoner júıesi, lıft jáne múmkindigi shekteýli jandarǵa arnalǵan oryndar, sondaı-aq qorshaǵan ortaǵa az áser etetin ekologııalyq taza dárethana bar.
Poıyz Nurly Jol (Astana) stansııalary men Býrabaı kýrorty arasynda toqtaýsyz júretin bolady. Jol júrý ýaqyty 2 saǵat 26 mınýtty quraıdy. Al bılet quny Nurly Jol stansııasynan – 2770 teńge, Astana stansııasynan - 2548 teńge.
«Poıyzdy iske qosý úshin vagondardyń biregeı dızaıny jasaldy. Syrtqy bezendirýge Báıterek, Qazaq eli monýmenti, Nur-Álem murajaıy jáne Shýche-Býrabaı kýrorttyq aımaǵynyń kórkem peızajdary sııaqty Astana men Býrabaıdyń kórnekti jerleriniń beıneleri kiredi. Sondaı-aq vagondarda Visit Astana jáne Visit Aqmola óńirleriniń týrıstik brendteri ornalastyrylǵan. Vagondardyń ishki bezendirilýi Astana qalasynyń mádenı erekshelikterin jáne kýrorttyń tabıǵı sulýlyǵyn kórsetedi», delingen Astana qalasy ákimdiginiń habarlamasynda.
Poıyzdyń taǵy bir ereksheligi - eksklıýzıvti aýdıo týr. Sapar barysynda jolaýshylar Astana men Býrabaıdyń tarıhy, mádenıeti men tabıǵı baılyǵy týraly qyzyq faktilerdi bile alady.
