Sýret: okg.kz
Polıseıler dúkender, saýda úıleri men pırotehnıkalyq ónimderdi satýǵa bolatyn oryndar boıynsha reıdter júrgizip, ruqsat berý qujattaryn tekserip jatyr. Kásipkerler men satýshylarǵa ónimdi kámeletke tolmaǵandarǵa satýǵa tyıym salynatynyn, jarylys qaýpi bar buıymdardy zańsyz ótkizgeni úshin jaýapkershilik baryn eskertip keledi.
«Tártip saqshylary áleýmettik jelilerge monıtorıng júrgizedi. Onda keıbir azamattar pırotehnıkalyq ónimderdi onlaın satatyny anyqtaldy. Pavlodarda Baıjanov kóshesinde ruqsat qujattarynsyz pırotehnıkalyq buıymdardy satý deregi anyqtaldy. Satýshydan 45 jaǵý zaty bar 4 qorap tárkilendi. Taýarlardy zańsyz satqany úshin satýshy qyzmetker jaýapqa tartylyp, 25 aılyq eseptik kórsetkish mólsherinde aıyppul salyndy», dep habarlady Pavlodar oblysy polısııa departamentiniń baspasóz qyzmetinen.
Polıseıler otshashýlardy satyp alý kezinde satýshydan ónim sertıfıkatyn talap etý kerektigin eskertedi. Pırotehnıkalyq ónimderdiń syrtynda nemese qorabynda paıdalaný nusqaýlyǵy mindetti túrde bolýy kerek. Eger ónimniń jaramdylyq merzimi ótip ketse, ony paıdalanbaǵan abzal. Buǵan qosa pırotehnıkalyq buıymdardy qaltada alyp júrýge, bólshekteýge, úıkeleýge jáne ystyq jerde keptirýge bolmaıdy. Ata-analar ot-shashýdy balalarynyń baqylaýsyz paıdalanýyna tyıym salýy qajet.
Pırotehnıkany durys qoldanbaýdyń saldarynan kóptegen adam zardap shegip jatady. Sońy órtke ulaspas úshin turǵyndar qandaı qaýipsizdik erejelerin saqtaý kerek ekenin de eskerken jón.
«Aldymen otshashý ornyn tańdaý qajet. Tańdalǵan orynnan 50 metr qashyqtyqtaǵy radıýsta ǵımarattar jáne basqa da qurylystar bolmaýy kerek. Otshashý nusqaýlyqqa sáıkes myqty jerge ornatylýǵa tıis. Adamdar mindetti túrde otshashý alańynan 15-20 metr qashyqtyqta, jel jaǵynda turý qajet. Feıerverkterdi ǵımarat ishinde, ásirese adamdar bolǵan kezde paıdalanýǵa tyıym salynady. Otshashýdy qatty jel bolǵan jaǵdaıda tutatpaǵan jón. Ol qaýipti 3-4 ese arttyrady. Pırotehnıkalyq buıymdardy aǵashtardyń, elektr jelileriniń astynda jáne tez tutanatyn zattardyń janynda atýǵa bolmaıdy. Eger otshashý janbaı qalsa, 10 mınýt kóleminde oǵan jaqyndamańyz», dep eskertedi mamandar.
Aıtyp ótý kerek, sertıfıkattalmaǵan pırotehnıkalyq buıymdardyń, sondaı-aq ruqsat qujattary joq zańsyz saýda úshin Ákimshilik quqyq buzýshylyq týraly kodekstiń 196-baby boıynsha ákimshilik jaýapkershilik kózdelgen. Al órt qaýipsizdigin saqtamaǵan azamattar atalǵan kodekstiń 410-baby boıynsha ákimshilik jaýapkershilikke jáne Qylmystyq kodekstiń, 204, 292-baptary boıynsha qylmystyq jaýaptylyqqa tartylatynyn umytpaǵany jón.
Pavlodar oblysy
