Foto: Aqorda
Memleket basshysy mártebeli meımanǵa iltıpat bildire otyryp, ekijaqty yqpaldastyqtyń damýyna tyń serpin berý turǵysynan bul sapardyń mańyzy zor ekenine nazar aýdardy.
«Siz Qazaqstanǵa Gvıneıa-Bısaýdyń Prezıdenti retinde alǵash ret kelip tursyz. Muny tarıhı sapar deýge bolady. Joǵary deńgeıdegi osy kezdesý eki el arasyndaǵy qarym-qatynastyń jańa kezeńine jol ashady dep senemin», dedi Prezıdent.
Qasym-Jomart Toqaev byltyr Qazaqstan men Gvıneıa-Bısaý arasynda dıplomatııalyq qarym-qatynastyń ornaǵanyna 10 jyl tolǵanyn atap ótti. Prezıdenttiń aıtýynsha, búgingi tarıhı kezdesý ózara tıimdi seriktestikti odan ári tereńdetýge negiz bolady.
«Osy kezeń ishinde biz ózara qoldaý men berik dostyqqa negizdelgen yntymaqtastyq ornattyq. Seriktestigimizdi odan ári damytýǵa mol múmkindik bar. Ásirese, ekonomıka jáne saýda-sattyq salalarynyń áleýeti joǵary. Men búgingi saparyńyzdy eki eldiń yntymaqtastyǵyn nyǵaıtýǵa baǵyttalǵan mańyzdy qadam dep qarastyramyn», dedi Memleket basshysy.
Ýmarý Sısoký Embalo qonaqjaılyq kórsetkeni úshin Qasym-Jomart Toqaev pen Qazaqstan halqyna alǵys aıtty.
«Meniń búgingi saparym Bısaý men Astana arasyndaǵy dostyq baılanystar men yntymaqtastyqty nyǵaıtýǵa qos taraptyń da nıetti ekenin aıǵaqtaıdy», dedi Ýmarý Sısoký Embalo.
Gvıneıa-Bısaý Prezıdenti eki el kópjaqty qurylymdar, sonyń ishinde BUU aıasynda tabysty yqpaldastyq ornatqanyna toqtaldy. Ol Qasym-Jomart Toqaevtyń BUU men ózge de halyqaralyq uıymdardy reformalaýǵa qatysty ustanymyn qoldaıtynyn jetkizdi.
Taraptar aýyl sharýashylyǵy, kólik-logıstıka, taý-ken metallýrgııasy, qarjy, sıfrlandyrý jáne telekommýnıkasııalyq tehnologııalar sııaqty perspektıvti salalarda yqpaldastyq ornatý máselelerin qarastyrdy.
