Foto: Úkimet
Premer mınıstrdiń óńirge sapary aıasynda oblystyń áleýmettik-ekonomıkalyq damý perspektıvalary, kadrlyq áleýetti arttyrý, ınfraqurylymdyq mindetterdi sheshý barysy talqylandy.
Sondaı-aq biryńǵaı ýaqyt beldeýine kóshý máselesine de nazar aýdaryldy. Qostanaı oblysynyń turǵyndary buryn da kótergen, óıtkeni 6-shy ýaqyt beldeýi tabıǵı ýaqytqa sáıkes kelmegen. Turǵyndardyń aıtýynsha, biryńǵaı ýaqyt beldeýine kóshý týraly sheshim kúndelikti turmystyq prosesterdi jeńildetti. Osyǵan baılanysty kezdesýge qatysýshylar biryńǵaı ýaqyt beldeýin qoldaıtynyn aıtty.
Premer-mınıstr Oljas Bektenov turǵyndarmen áńgimelesý barysynda tabıǵı ýaqyttyń azamattardyń densaýlyǵy men ál-aýqatyna oń áseri ǵylymı dáleldengenine nazar aýdardy. 2017 jyly amerıkalyq ǵalymdar toby adamnyń sırkadtyq yrǵaǵyn zerttegeni úshin Nobel syılyǵymen marapattaldy, bul tabıǵı ýaqytqa sáıkes ómir súrýdiń eń paıdaly ekenin rastady. Osy jumystyń jáne basqa da ǵylymı zertteýlerdiń negizinde 2022 jyly 80-nen astam eldiń ǵalymdary men memleket qaıratkerleri qol qoıǵan Barselona deklarasııasy qabyldanǵan.
«Sheshim Qazaqstanda ǵana emes, shetelde de júrgizilgen óte tereń ǵylymı zertteýler negizinde qabyldandy.
Qazaqstan úshin tabıǵı ýaqyt beldeýi – biz qazir ómir súrip jatqan UTC+5 bolyp tabylady. Buryn ózderińiz biletindeı, biz basqa UTC+6 beldeýinde boldyq. Kezinde elimiz dırektıvalyq tártipte biz úshin tabıǵı emes beldeýge aýystyryldy. Qazir, kerisinshe, biz ýaqytty kún sıkline sáıkes keltirdik.
Men biryńǵaı ýaqyt beldeýine aýysý keıbir adamdarǵa yńǵaısyzdyq týdyrýy múmkin ekenin túsinemin. Aǵza birtindep úırenedi. Osyndaı sheshim qabyldandy. Eger óńirlerde qandaı da bir qolaısyzdyqtar bolsa, bizdiń eńbek zańnamamyz múmkindik beretin ınfraqurylymdy, jaryqtandyrýdy, yńǵaıly kesteni uıymdastyrý arqyly jumys isteý qajet. Osy máselelerdiń barlyǵyn ári qaraı sheshetin bolamyz», dedi Premer-mınıstr.
Sondaı-aq, zaýyt ujymymen kezdesý barysynda Memleket basshysy jarııalaǵan aldaǵy Jumysshy mamandyqtary jyly qarsańynda eńbek jaǵdaılary jáne ózge de qoldaý sharalary týraly másele kóterildi.
