Jyr festıvalin osy is-shara úshin Tobyl óńirine arnaıy kelgen Qazaqstannyń eńbek sińirgen qaıratkeri, jyrshy, folklor zertteýshi Almasbek Almatov júrgizdi. Áıgili jyrshy atalǵan jobaǵa bes jyldan beri qoldaý kórsetip, janashyrlyq tanytyp keledi. Is-shara barysynda oblystyń mádenıet salasynyń basshylary Almasbek aǵamyzǵa qurmet kórsetip, ıyǵyna shapan japty.
«Uly Torǵaı dalasyn dástúrli ónerimizdiń qalyptasýyna birden-bir eńbek sińirgen aımaq dep bilemiz. Aıryqsha shoqtyǵy bıik tulǵa Nurjan Naýshabaev shyǵarmashylyǵyna arnalǵan búgingi baıqaýdyń orny erekshe. Elimizdiń ár túkpirinen kelgen talantty oryndaýshylar osy baıqaý arqyly qanattanyp, elge tanylyp jatyr. Mysaly, úshinshi baıqaýda Qostanaı oblysynyń azamaty bas júlde aldy. Baıqaý ótip kele jatqan bes jyl ishinde Nurjan ánderin nasıhattaýda, onyń buryn belgisiz bolyp kelgen shyǵarmalaryn jaryqqa shyǵarýda birtalaı sharýa atqaryldy. Ǵalymdar Nurjan shyǵarmashylyǵyna den qoıyp, zertteý jumystaryn júrgizdi. Aqylbek Shaıahmet bastap, onyń ar jaǵynda aqyn muralaryn zerttegen birneshe jas ǵalym ǵylym kandıdaty dárejesin qorǵady. Olaı bolsa, qazaq mýzyka tarıhynda Nurjannyń óz orny bar dep aıta alamyz. Búgingi is-sharaǵa Aıgúl Qosanova, Baǵlan Bábijan syndy el súıispenshiligine bólengen ónerpazdar kelip otyr. Bul kisiler konservatorııada akademııalyq deńgeıde Nurjan shyǵarmashylyǵynyń tanylýyna kóp eńbek sińirip júr. Festıvaldy keler jyly konferensııa túrinde ótkizýdi kózdep otyrmyz. Ondaǵy maqsatymyz – Tobyl-Torǵaı óńiriniń folkloryn ǵylymı turǵyda qarastyrǵymyz keledi», dedi Almasbek Almatov.
Festıval aıasynda úsh ónerpaz da kópshiliktiń ótinishimen sahanaǵa shyǵyp óner kórsetip, eldiń qurmet-qoshemetine bólendi. Qazaq ulttyq konservatorııasy ǵylymı-zertteý folklorlyq zerthanasynyń jetekshisi Baǵlan Bábijan Ahmet Baıtursynulynyń «Kámshat bórik» ánin áýelete shyrqady.
«Aqańnyń Zataevıchke 25 án bergeni belgili. Zataevıch qazaq tilin bilmegen soń, sózin jazbaǵan. Tek «Qaragóz» jáne «Kámshat bóriktiń» sózi bar. «Kámshat bórik» – Tobyl-Torǵaıdyń áni. Sondyqtan Aqań bul ánniń saqtalyp qalýyna qalaıda yqpalyn tıgizdi. Biraq mátininde qazaqtyń kóne sózderi, dinı sózder bolǵandyqtan, 70–80 jyl boıy aıtylmaı keldi. Men konservatorııada oqyp júrgenimde ustazym Bekbolat Tileýhan: «Osy ándi oryndap kórshi», dedi. 1999 jyly memlekettik emtıhanda aıtyp shyqtym. Sodan beri repertýarymda», deıdi ánshi.
Festıvalǵa qatysýshylardyń bárine alǵyshattar men estelik syılyqtar tabys etildi. Baıqaýdan keıin dástúrli ánshi Aıgúl Qosanova jergilikti ónerpazdarǵa ánshilik mektepter, oryndaýshylyq sheberlik týraly dáris oqydy.
Qostanaı oblysy
