Kezdesý jastardyń memlekettik qyzmetke kelýine jasalǵan múmkindikterdi túsindirý, olarǵa ádilettilik pen adaldyq, azamattyq sana qundylyqtaryn, otansúıgishtik qasıetterdi nasıhattaý maqsatynda uıymdastyryldy.
Is-sharaǵa óńirlerdegi jastar beınekonferensbaılanys arqyly Akademııa fılıaldarynan qosyldy jáne mektep oqýshylary men joǵary oqý oryndarynyń stýdentteri, «Jas memlekettik qyzmetshiler mektebiniń» tyńdaýshylary qatysty.
Darhan Jazyqbaı memlekettik qyzmet salasyn damytý jumystary sheńberinde «Ádiletti Qazaqstan – Adal azamat» qaǵıdattaryna sáıkes ashyqtyq, ádildik, otansúıgishtik qasıetterge basa kóńil bólinip otyrǵanyna toqtaldy.
«Memleket basshysy «Qazaqstan – jas ári jastardyń memleketi! Jastarymyz – damýdyń qozǵaýshy kúshi. Barlyq memlekettik organdardyń mindeti – jastardyń ózin-ózi jaqsy tanytýyna jaǵdaı jasaý jáne olardyń oń bastamalaryna qoldaý kórsetý» degen bolatyn. Eńbekqor, otanǵa qyzmet etýdi paryz sanaıtyn jastar – el damýynyń qozǵaýshy kúshi. Halqymyz qashan da jastarǵa úlken úmit artqan. Agenttik daryndy, bilimdi, bastamashyl jastardy memlekettik qyzmetke tartýdy turaqty jolǵa qoıyp otyr. Sol arqyly memlekettik qyzmetshilerdiń jańa býynyn qalyptastyrýdamyz. Jastardyń boıyndaǵy kúsh-qýat pen qabiletti elge qyzmet etýge baǵyttaý bizdiń basty maqsatymyz. Bolashaqta memlekettik qyzmetke qyzyǵýshylyq tanytyp, osy joldy tańdasańdar týǵan otanymyz Qazaqstandy kórkeıtýge tikeleı úles qosa alasyńdar», dedi Agenttik tóraǵasy Darhan Jazyqbaı.
Agenttik zaman talabyna saı sıfrlandyrý arqyly kadrlardy irikteýdiń ashyq jáne ádil júıesin qalyptastyrý maqsatynda «eQyzmet.gov.kz» saıtynda memlekettik qyzmetke qabyldaýdyń onlaın júıesin engizgen.
Sońǵy ózgeristerge sáıkes joǵary oqý oryndaryn jaqsy kórsetkishpen (GPA 3,33-ten joǵary) bitirgen 430-dan astam túlek aýdandyq jáne aýyldyq jerlerdegi tómengi laýazymdarǵa konkýrssyz qabyldandy. Aımaqtarda memlekettik qyzmetshi bolýǵa yntaly jastardy anyqtaý, olarǵa memlekettik qyzmettiń erekshelikterin túsindirý jáne qyzyǵýshylyǵyn arttyrý jumystaryn júrgizetin jas memlekettik qyzmetshilerdiń mektepteri jumys jasap jatyr.
Memlekettik apparatqa qajetti daryndy jastardy irikteý úshin Prezıdenttik jastar kadr rezervi jáne О́ńirlik kadr rezervi qalyptastyryldy.
Is-shara barysynda jastar 2024-2029 jyldarǵa arnalǵan memlekettik qyzmetti damytýdyń jańa tujyrymdamasy sheńberinde salaǵa qajetti jas talanttardy yntalandyrýdy kózdeıtin, mektep jáne ýnıversıtet deńgeıinde erte kásiptik baǵdarlaý ınstıtýtyn qurý bastamasyna qyzyǵýshylyq tanytty.
Jastar Agenttik tóraǵasyna ózderin qyzyqtyrǵan suraqtaryn qoıyp, pikir almasty. Darhan Jazyqbaı «Adal azamat» ıdealyna tán qasıetterdiń jastarymyz úshin mańyzdylyǵyna toqtalyp, olarǵa memleketshil bolýdyń, otan aldyndaǵy jaýapkershilik pen paryzdyń qashanda bıik turý qajettiligin aıtty.
Is-shara barysynda jastarǵa Akademııada ekskýrsııa júrgizilip, memlekettik qyzmetshilerdiń biliktiligin arttyrýǵa arnalǵan sıfrlyq kovorkıng zaly, medıa-stýdııa, aqparatty 3D-gologramma, murajaı jáne kitaphana jumysy tanystyryldy.
