Foto: gov.kz
Ekonomıkalyq reforma jáne óńirlik damý komıtetiniń tóraǵasy N.Sabılıanov aldymen, Kólik mınıstrliginiń eldegi joldardyń qanaǵattanarlyq úlesi 87 paıyz degen deregimen kelispeıtinin aıtty.
Sebebi, jergilikti joldardyń tek 31 myń shaqyrymynda nemese 44 paıyzynda asfalt-beton jabyny tóselgen. Al qalǵan 39 myń shaqyrymynda nemese 56 paıyzynda qıyrshyq, usaq tastar men topyraq tóselip jatyr. Depýtat ekinshi aıtylǵan tıptegi joldardy qanaǵattanarlyq deńgeıge qospaýdy surady.
«Osyǵan baılanysty qıyrshyq, usaq tastar men topyraq tóselgen joldardy qanaǵattanarlyq jaǵdaıdaǵy joldarǵa jatqyzbaý úshin avtojoldardyń sapasyn baǵalaý ólshemsharttaryn qaıta qaraý qajet dep esepteımiz. Nátıjesinde biz jergilikti mańyzy bar avtomobıl joldarynyń naqty jaı-kúıi týraly biletin bolamyz», dedi Nurtaı Sabılıanov.
Ol qatysatyn «QazAvtoJol» ulttyq kompanııasy» aksıonerlik qoǵamynyń atqaratyn fýnksııasyn qaıta qaraýdy da usyndy.
«Memleket 100% qatysatyn «QazAvtoJol» ulttyq kompanııasy» aksıonerlik qoǵamy avtomobıl joldarynyń Ulttyq operatory bolyp tabylady. Biraq ol bir ýaqytta 2 fýnksııa atqarady, atap aıtqanda, avtomobıl joldaryn salý jáne olardy rekonstrýksııalaý, jóndeý men kútip-ustaýdyń uıymdastyrylý barysy men sapasyn baqylaý. Iаǵnı, ol joldy ózi salyp, ózin-ózi baqylaıdy eken. Osyndaı jaǵdaı Jol aktıvteri sapasynyń ulttyq ortalyǵynda da oryn alýda, ol jobalarǵa vedomstvolyq saraptamany ózi júrgizedi, tańdaý túrindegi qurylysqa usynystardy ózi beredi jáne merdiger uıymdardyń jumysynan kemshilikterdi ózi tabady. Sóıtip, múddeler qaqtyǵysy týyndaıdy», dedi depýtat.
Májilismen joldardy tehnıkalyq qadaǵalaý qyzmetiniń álsizdigine de toqtaldy. Memleket basshysy 2029 jylǵa deıin tórt myń shaqyrymnan astam avtomobıl joldaryn sapaly túrde rekonstrýksııalaý mindetin qoıyp otyr. Búgingi tańda Memleket basshysynyń tapsyrmasyna sáıkes «uzaqqa sozylǵan qurylys» jobalaryn iske asyrý boıynsha aýqymdy jumystar 90%-ǵa aıaqtaldy, olar: «Qaraǵandy - Balqash-Almaty» (885 km), «Atyraý - RF shek. (Astrahanǵa)» (217 km), «Aqtóbe - Qandyaǵash» (96 km), sondaı-aq «Taldyqorǵan - О́skemen» (768 km), jalpy uzyndyǵy shamamen 2 myń shaqyrym jol (1966 km-den 1960 km-ge jol qamtamasyz etilgen). Sondaı-aq, N.Sabılıanov qurylysy uzaqqa sozylǵan respýblıkalyq mańyzy bar avtojoldardyń máselesin ortaǵa saldy.
«Qalbataý - Maıqapshaǵaı» tas jolyn jóndeý 2019 jyldan beri bes jylǵa jýyq ýaqyt júrgizilip keledi. Biraq jóndeý jumystary áli kúnge deıin aıaqtalǵan joq. Uzyndyǵy 412 km bolatyn respýblıkalyq mańyzy bar «Qyzylorda – Jezqazǵan» avtojoly eń úlken másele bolyp otyr. Osy ýchaskeni jóndeý jumystaryn aıaqtaýdy jedeldetý qajet. Sonymen qatar, mysaly, respýblıkalyq mańyzy bar Qaraǵandy - Aıagóz - Buǵaz avtojolynyń jaı-kúıi qanaǵattanarlyq jaǵdaıda emes ári onyń jekelegen ýchaskelerinde tipti asfalt jabyny múldem joq, shuńqyr-shuńqyr. Bul másele osy óńirdiń turǵyndary arasynda jıi kóteriledi. Bıyl jóndeý jumystary bastaldy, endi baqylaýdy kúsheıtý kerek», dedi depýtat.
N. Sabılıanov eldiń kólik-logıstıka áleýetin damytýǵa aıtarlyqtaı áser etetin saladaǵy osy máselelerdi sheshý úshin jaýapty mınıstrlik naqty sharalar qabyldaýy qajet ekenine nazar aýdardy.
